Tres pesos pesados da historia do Lugo analizan o preocupante estado do equipos antes do partido de Albacete

Alvite, Miguel García e José Angel son tres dos xogadores con máis partidos na historia do Lugo. Entre eles suman 894 encontros, o que os converte en voces autorizadas á hora de analizar nunha mesa redonda a situación do equipo.

Alvite. 441 partidos co C. D.Lugo. "Perigosa".

José Ángel. 219 partidos co C. D. Lugo. "Preocupante".

Miguel García. 234 partidos co C. D. Lugo. "Delicada".

Os tres, que participaron do primeiro ascenso do Lugo a Segunda división en 1992, enumeran as causas que, segundo eles, levaron o equipo os postos de descenso.

Alvite cre que "o presidente non foi capaz de perfilar un proxecto continuísta, darlle tranquilidade á xente para que puidera traballar".

Para José Ángel, "o peche de ciclo, de xogadores importantes, a marcha de adestradores, outros xogadores que veñen...".

Miguel García indica que "é a propia categoría a que te pode meter nestas leas, dígoo porque case todos os clubs e todos os anos hai un troco de xogadores, co cal sempre tes un risco".

As solucións para os tres veteranos tamén son diversas. "Tanto no fútbol coma en calquera actividade deportiva se queres mudar algo, tes que cambiar o xeito de pensar e facer mudar o xeito de pensar os teus xogadores", di José Ángel.

Alvite opina que "evidentemente, teñen que fichar algo".

Para Miguel García "a solución é que cada xogador recobre o seu nivel".

O trío tamén ten motivos para crer na permanencia. José Ángel: "Dentro de dous partidos, hai cinco xornadas seguidas que veñen equipos moi fortes, da igual, temos que asumir que son capaces de facer cousas grandes".

Miguel García: "Hai que dicirlle a eses futbolistas que o equipo xa o conseguiu moitos anos e que a partir de aquí, é posible".

Alvite: "Os primeiros que teñen que crer son eles e as posibilidades que teñen".

Por diante quedan 18 xornadas e cincuenta e catro puntos en xogo nas que os xogadores deberán defender a camiseta.