Tráfico defende reducir prazos "excesivos" para a renovación do carné en persoas maiores

Tráfico estuda endurecer os psicotécnicos e acurtar os prazos de renovación do permiso de conducir da xente maior. É un dos debates que ten sobre a mesa a dirección xeral que encabeza Pere Navarro, e que estes días reúne a súa cúpula en Pontevedra. 

O accidente de tráfico ocorrido hai 3 días na AP-9 en Pontevedra, unha colisión en que se viron implicados un autocar e un coche dos sen carné, conducido por un home de avanzada idade, reabriu o debate sobre a necesidade de endurecer os requisitos de renovación do permiso de condución.

O director xeral de Tráfico, que este mércores inaugurou en Pontevedra a convención anual de directivos da DXT, confirmou que están avaliando a posibilidade de que as persoas maiores renoven o carné en intervalos máis curtos, agora por norma xeral é cada 5 anos.

"A todo o mundo lle parecen excesivos, hai que adecualo, pero, claro, xente maior, o tema é delicado", aseguraba Pere Navarro.

"Hai unha directiva de permisos de conducir que está en Europa, estamos un pouco á espera do que veña e tamén nos temos dirixido a asociacións de xente maior dicíndolles, todos vedes que 5 anos de renovación para alguén que ten 80, 85, 90 anos é moito, propoñede que prazos vos parecerían razoables", dicía o director xeral de Tráfico.