Toca empezar a estudar: os especialistas recomendan música tranquila e sen altos e baixos

Soa Bach na guitarra de María Cores, alumna do último curso do Conservatorio Superior de Vigo. É o exemplo ideal do tipo de melodía que os especialistas recomendan para concentrarse. Hai estudos que demostran o que moita xente intúe, que a música pode axudar a relaxarnos; outros, que estimula as actividades cerebrais máis beneficiosas para estudar, como a concentración e a memoria. Pero non existe unha melodía universal: nin a todos lles axuda a música nin todas as músicas axudan. Experimentos realizados por todo o mundo suxiren que, en xeral, o mellor son temas estables, sen altos e baixos.

"Intentar evitar música con moitos contrastes fortes, rápido-lento, mellor algo pausado", explica Margarita Escarpa, profesora de guitarra clásica no conservatorio de Vigo.

"Non é o mesmo pasear polo parque do Castro que ir ao centro da Gran Vía e que haxa unha morea de tráfico. Pois na música ocorre exactamente o mesmo", engade o director do conservatorio, Esteban Valverde.

O que adoita funcionar, para a maioría, é un son neutro, que non chame demasiado a atención. Se se trata de música con letra e a recoñecemos, é posible que nos acabe distraendo. Pero tamén hai quen non quere música, nada de nada.

"A música axúdame porque me relaxa e concéntrome mellor, pero hai veces que poño unha canción que me fai bailar un pouco a cabeza", conta un alumno de FP do Colexio Hogar de Vigo.

Á hora de estudar, cada alumno ten o seu libriño. Na Academia Salgado, histórico centro de formación de Vigo, teñen un amplo repertorio: apuntamentos ordenados, cores suaves e respecto polas horas de descanso. Se a alguén lle gusta quedar a repasar pola noite, que durma ata tarde pola mañá. E hai quen pide música e ata a televisión, pero co volume baixo.

"Tivemos un par de alumnos que dicían que, simplemente vendo o movemento das persoas, se concentraban", relata Tere Nicolás, mestra de galego na academia.

A música, iso si, non adoita servir para os propios músicos. Case todos din que son incapaces de pensar noutra cousa se escoitan unhas notas, porque, sen querer, ponse a 'ler' esa música.

"A min o que me adoita axudar bastante son eses audios de ruído branco que hai en Internet, que illan moito os sons externos", asegura María, a alumna de guitarra do conservatorio de Vigo.

E hainos que só piden silencio e incluso algún que só se quere escoitar a si mesmo: camiñando pola casa e recitando en voz alta o que ten que aprender. Cada un, ao seu ritmo.