Sumar non irá ao próximo Consello de Ministros se non inclúe medidas de vivenda
Consideran responsabilidade do Goberno aprobar un decreto que inclúa medidas como a "prórroga reforzada" dos alugueiros, a protección das familias fronte aos desafiuzamentos e os fondos voitre e a regulación dos usos especulativos da vivenda
Sumar non acudirá á próxima reunión do Consello de Ministros se non se inclúe un paquete de medidas efectivas fronte á crise da vivenda para que se aprobe un decreto “si ou si”.
“Non valen parches”, asegurou o movemento este sábado nun comunicado no que sinalou que “o Goberno non se pode poñer máis de perfil”, nin expor “medidas descafeinadas.”
O desafiuzamento de Maricarmen, unha muller de 87 anos que tivo que abandonar o pasado mércores a súa vivenda de alugueiro tras 70 anos, colocou o problema da vivenda no foco político e social, con protestas nas rúas.
Sumar considera responsabilidade do Goberno aprobar un decreto que inclúa medidas como a "prórroga reforzada" dos alugueiros, a protección das familias fronte aos desafiuzamentos e os fondos voitre e a regulación dos usos especulativos da vivenda.
Tamén esixe medidas como a "recuperación" da vivenda de Maricarmen e a renovación automática dos contratos de alugueiro, “para que ninguén teña que deixar o seu fogar porque alguén queira facer negocio con el”.
Para Sumar, a sociedade “non vai aceptar respostas parciais nin medidas descafeinadas fronte ao drama dos desafiuzamentos e ante un problema tan profundo e urxente como a crise de vivenda”.
“Basta escoitar á rúa; fan falta reformas efectivas e integrais que son xa medidas de consenso social, sen escusas nin rebaixas”, subliñaron.
Así, advertiu de que os partidos do espazo de Sumar farán “o que sexa necesario para aprobar este decreto xa. Si ou si”, e lembraron que hai medio ano xa se plantaron e non acudiron á reunión semanal do Gobierno por este mesmo tema, “e volverémonos a plantar o martes se fai falta”.
