Sortean un tractor de leña polas festas da Arnoia e esgotan as papeletas
Non agardaban vender as rifas tan rápido, e aseguran que se puxesen outro tractor de leña tamén acabarían as papeletas todas
Un milleiro de persoas participarán no sorteo, que será a fin de semana despois destas festas
A inventiva das comisións de festas para recadaren cartos non ten límites. Na Arnoia sortean un remolque de leña lista para queimar. A idea tivo un éxito que os desbordou.
Buscaban algunha idea para lle dar a volta ás festas de santa Rita, que ano a ano foron vendo esmorecer. Querían facer algo que ademais animase a xente para o ano que vén.
E alá foron. E cortaron leña de carballo. Nin traballo lles pareceu, explican, porque participaron todos os membros da comisión e axudáronse os uns aos outros.
Encheron o tractor e puxeron rifas a tres euros. Sacaron 1.000 papeletas. Voaron. E din que aínda hai xente que lles pide algunha máis, pero xa non lles dá tempo.
O sorteo será a fin de semana seguinte á festa de santa Rita, que xa lles deu co tractor de leña un éxito que non lles quita ninguén.
