Sánchez ve o PP como "enciclopedia de corrupción" e Feijóo chámalle "lobo da manda" nun debate tenso

Pedro Sánchez e Alberto Núñez Feijóo encerelláronse nun duro cruzamento de reproches sobre a corrupción nos seus respectivos partidos que levou o líder do PP a esixir a dimisión ao presidente do Goberno por ser o lobo da manda e o xefe do Executivo a acusar os populares de seren unha enciclopedia da corrupción.

Sánchez e Feijóo mantiveron un tenso cara a cara na sesión de control ao Goberno do pleno do Congreso, o primeiro que protagonizan despois da saída de Santos Cerdán da Secretaría de Organización do partido tras o informe da UCO coñecido a pasada semana. O xefe do Executivo enumerou unha serie de presuntos casos de corrupción do PP, tanto nacionais como autonómicos, e insistiu en retar a Feijóo a que presente unha moción de censura que o líder dos populares non descartou se consegue catro votos adicionais.

Un enfrontamento no que a posibilidade dunha moción de censura estivo en boca de ambos, xa que se Sánchez volveu a retar a Feijóo a que a presente se ten apoios, este non descartou facelo se consegue catro votos adicionais. O cruzamento de acusacións iniciouno Feijóo cualificando a Sánchez de "o lobo que liderou unha manda corrupta" todos estes anos e chamoulle a aforrarse "os numeriños de cordeiro degolado" xa que, por moito que se maquille -engadiu- non é a vítima, pois a vítima son os españois. 

Afirmou que a Sánchez advertíronlle hai meses que Cerdán era un corrupto e que é un presidente profundamente atrapado nunha trama de corrupción cuxo único colaborador “máis estreito” que Cerdán é Ábalos. Dixo que Sánchez deulle "un xiro moi perigoso" á vontade popular que veu a dicir que non dimite porque España necesita as súas políticas progresistas, pero que non convoca eleccións porque as perde. "Sánchez non ten que salvar os españois de si mesmos. Os españois queren salvarse de vostede. A única carta que esperan é a carta de dimisión. Pensa redactala?", preguntoulle.

Respecto á moción de censura dixo que non lle faltan ganas, senón catro votos. "Se aparecen, non dubidarei nin un instante, e quen sabe se aparecerán porque Ábalos foi o principio pero Cerdán non será o final", afirmou. Feijóo referiuse na súa intervención final aos socios de goberno, que dixo que teñen que elixir se queren seguir na trama de corrupción" mencionando directamente a PNV, Junts e ERC.

O presidente do Goberno iniciou o seu contraataque advertindo de que fronte ás peticións de adianto electoral por parte do PP, o único adianto que vai haber é, á volta do verán, o das sentenzas sobre presuntos casos de corrupción que afectan o Partido Popular.

"A corrupción cero non existe, pero na miña organización a tolerancia contra a corrupción é absoluta", garantiu para contrastar esa actitude coa do PP, que dixo que expulsan os que a denuncian. Admitiu Sánchez que o PSOE sufriu un caso "doloroso" de corrupción, pero actuou, algo que insistiu en que non fai o PP. 

A continuación enumerou unha serie de casos que dixo que afectan dirixentes territoriais populares, empezando pola Comunidade de Madrid, ao sinalar que o Goberno de Isabel Díaz Ayuso está a ser investigado "polo mozo, polo irmán, por tramas de corrupción vinculadas co fraccionamento de contratos nos centros de formación profesional".

A iso engadiu que o presidente andaluz, Juanma Moreno, "expulsa e cesa os interventores que están a denunciar os casos de corrupción"; que o presidente da Comunidade Valenciana, Carlos Mazón, sexa investigado por financiamento irregular do PP e que o de Castela e León, Alfonso Fernández Mañueco, teña dous exviceconselleiros recentemente condenados e cunha trama eólica. Tamén se referiu ao presidente da Xunta, Alfonso Rueda, ao manter durante tempo a un conselleiro que fora denunciado por agresión sexual. Todo iso é o que levou a Sánchez a considerar o PP "unha enciclopedia de corrupción con capítulos autonómicos".

Berros de dimisión do PP a Sánchez no Congreso e aplausos do PSOE ao seu líder

A bancada do PP en pé pediu este mércores no Congreso a dimisión do presidente do Goberno Pedro Sánchez con berros desde os seus escanos que foron respondidos polos deputados do PSOE con aplausos ao seu líder.

Foi durante o cara a cara entre Sánchez e o líder da oposición Alberto Núñez Feijóo e despois de que o xefe do Executivo dixese que o PP é unha enciclopedia de corrupción, aínda que as protestas dos populares xa se iniciaron coa intervención do presidente do Goberno. Aos berros de dimisión do PP responderon desde a bancada do PSOE en pé con aplausos a Pedro Sánchez, incluídos os ministros.

A presidenta do Congreso, Francina Armengol, pediu repetidamente respecto aos deputados e dirixiuse ao presidente do PP para que puxese orde no seu grupo e deixasen intervir os membros do Goberno.

Sánchez considera que o caso de Santos Cerdán é "a anécdota, non a categoría", e subliña que non é a Gürtel do PSOE

O presidente do Goberno, Pedro Sánchez, considera que o caso que provocou a dimisión do seu número tres, Santos Cerdán, é a "anécdota", pero non a "categoría", e subliñou que "a esquerda non rouba" e que o coñecido como caso Koldo non é a trama Gürtel do PSOE.

Foi este mércores durante a sesión de control ao Goberno no Congreso cando o portavoz de ERC na Cámara Baixa, Gabriel Rufián, se dirixiu ao xefe do Executivo para saber "que vai facer" fronte a todo o que está a pasar tras o informe da UCO que apunta ao secretario de organización do PSOE Santos Cerdán pola presunta cobranza de comisións.

Rufián reclamoulle a Sánchez que deixe claro que non estamos ante "a Gürtel do PSOE" porque a "esquerda non pode roubar", e se o Goberno de coalición cae será "culpa" do PSOE se segue sen actuar.

Ante isto, Sánchez respondeu ao dirixente independentista advertindo de que o único que hai actualmente son "indicios" recollidos no informe da UCO e non unha "sentenza en firme" que condene os exdirixentes socialistas nin tampouco o PSOE por financiamento irregular. "Non vou aceptar que faga da anécdota unha categoría porque a esquerda non rouba", sentenciou.

Yolanda Díaz e dous ministros de Sumar faltan ao pleno onde Sánchez responde ao caso Koldo 

A vicepresidenta segunda do Goberno, Yolanda Díaz, e outros dous ministros de Sumar decidiron non acudir este mércores ao pleno do Congreso onde o presidente do Executivo, Pedro Sánchez, foi interpelado polo caso Koldo, unha trama que está a provocar tensións entre os socios de coalición.

Fontes de Sumar limítanse a confirmar a EFE que Díaz; o ministro de Cultura e portavoz de Sumar, Ernest Urtasun, e a ministra de Mocidade e Infancia, Sira Rego, decidiron non acudir, sen dar detalles sobre os motivos. Tan só asistiron os outros dous ministros de Sumar, que son os que tiñan preguntas nesta sesión de control ao Goberno: a ministra de Sanidade, Mónica García; e o de Dereitos Sociais, Pablo Bustinduy.