Sánchez pide confianza aos españois coa amnistía e avisa: "Hai Goberno para tempo"

O presidente do Executivo, Pedro Sánchez, pediu confianza aos españois que dubiden coa lei de amnistía, tras pactar o PSOE con Junts e ERC un novo texto para levalo ao pleno do Congreso, e afirmou que "hai Goberno para tempo" nesta lexislatura, "pese a quen lle pese".

"Pido á cidadanía española que poida ver con dúbidas a lei de amnistía, como puido ver con dúbidas os indultos hai anos, que confíe nesta medida porque vai ser beneficiosa para a reconciliación e vai ser fundamental para garantir a prosperidade económica no noso país durante os próximos anos", dixo nunha conferencia de prensa xunto ao presidente de Chile, Gabriel Boric, durante a súa visita oficial ao país.

Son as primeiras declaracións públicas de Sánchez despois do acordo alcanzado entre o PSOE, Junts e ERC para volver levar ao pleno do Congreso a lei de amnistía incluíndo algunhas modificacións, como deixar fóra do perdón os actos que poidan ser cualificados como terrorismo segundo unha directiva europea, eliminando as referencias ao Código penal.

Sánchez vinculou os cambios introducidos ao borrador do ditame da Comisión de Venecia, que pedía melloras na lei, e avisou de que "hai Goberno para tempo".

"Van ser catro anos máis de goberno progresista, pese a quen lle pese, faráselle moi longo á oposición, pero así é a democracia", declarou.

Ademais, comentou que agora van seguir negociando "con todas as forzas parlamentarias" os orzamentos xerais do Estado de 2024, que confía en presentar no Congreso dos Deputados "canto antes".

"Queremos aprobar os orzamentos xerais do Estado no ano 2024 e queremos aprobar tamén os do ano 2025 e aspiramos a aprobar os do ano 2026", engadiu.

Sánchez destacou que o seu Goberno puxo en marcha xa a "axenda progresista" á que se comprometeu nas pasadas eleccións xerais, con medidas como a subida do salario mínimo interprofesional, a revalorización das pensións, a lei da paridade e este mesmo venres a lei contra a trata de seres humanos.

E subliñou a aposta do seu Goberno pola "reconciliación" e a "convivencia" con medidas como a lei de amnistía, cuxo obxectivo, subliñou, é "superar as consecuencias xudiciais" da crise que viviu Cataluña en 2017 co referendo unilateral de independencia.

Neste punto, reprochou ao PP que non se sinta "interpelado" por esta cuestión a pesar de ser, na súa opinión, o responsable desta "crise institucional e territorial" de Cataluña, e que non queira agora sumarse a "esta gran cita pola reconciliación e a concordia".

Así mesmo, insistiu en que a amnistía é unha proposición de lei que "entrou constitucional" no Congreso dos Deputados "e vai saír constitucional e acorde co Dereito europeo, como non pode ser doutra maneira para unha gran democracia como é a democracia española". 

O PP reduce a meses o futuro do Goberno. Núñez Feijóo di que non pode gobernar un país un partido que non é libre para tomar as súas decisións.

 "O Goberno de España está acurralado, atenazado e chantaxeado, pero o PP non. Nós somos un partido libre, que non temos negocios con ninguén, que non negociamos a dignidade da nación española xamais e que non ten máis obxectivo que practicar políticas reais e efectivas", dixo Alberto Núñez Feijóo.

A fenda entre o Goberno e o PP agrándase e, entrementres, os partidos independentistas seguen coa súa folla de ruta. Tanto Junts como Esquerra avisan que non renuncian á independencia e que o próximo paso é un referendo.