Sánchez dille a Abás que os responsables do "xenocidio" en Gaza renderán contas

Pedro Sánchez avogou este mércores ante o presidente palestino, Mahmud Abás, por unha paz real en Gaza, "non de cartón pedra", e aseguroulle que tarde ou cedo os responsables do "xenocidio" na Franxa renderán contas.

O xefe do Executivo fixo estas consideracións na súa comparecencia xunto a Abás no Pazo da Moncloa tras a reunión que ambos os dous mantiveron no marco da segunda visita do mandatario palestino a España desde que o Goberno decidiu o recoñecemento do seu Estado. Antes do encontro con Sánchez, participaba tamén nunha xuntanza co rei Filipe VI.

Sánchez salientou o simbolismo de que a xuntanza coincida co Día Internacional dos Dereitos Humanos. Segundo dixo, a data lembra que a dignidade humana é un valor incondicional, único e innegociable en todas partes, incluída a Franxa de Gaza e Cisxordania.

Tras salientar que 2025 foi un ano terrible para o pobo palestino, garantiu que, malia custar tempo, se retirarán todos os entullos para comezar a reconstrución do territorio.

Ademais, destacou a necesidade de reconstruír tamén a esperanza porque, tras o cesamento do fogo, lamentou que continúen os ataques, a violencia e as restricións que vulneran dereitos básicos.

"Para reconstruír a esperanza necesitamos unha paz de verdade que ten que estar cimentada na xustiza", engadiu.

Do mesmo xeito, defendeu que os responsables deste "xenocidio" deberán render contas "tarde ou cedo" para que as vítimas atopen xustiza, reparación e un certo descanso.

Para Sánchez, a paz só pode vir da man da convivencia, da solución dos dous estados, e ratificou o compromiso de España para axudar a que iso sexa posible.

España, engadiu, seguirá alzando a voz para que non caia no esquecemento a dramática situación do pobo palestino, lograr un cesamento do fogo real, "non de cartón pedra", e que a Autoridade Nacional Palestina xogue un papel central no futuro palestino.

Tamén para axuntar voces con outros países europeos, árabes e doutras partes do mundo para desenvolver unhas bases de seguridade que permitan poñer fin á violencia dunha vez por todas.

"España camiñará sempre da man de Palestina, un país amigo, un país que sentimos irmán", manifestou.

Postura "valente"

Pola súa banda, Mahmud Abás agradeceu o compromiso de España e a súa postura "valente" ante a situación que vive Palestina, así como a decisión "histórica" de recoñecela como Estado.

Afirmou que Sánchez tivo un papel de liderado para que outros países deran tamén o paso dese recoñecemento, e explicou que na reunión falaron, entre outros asuntos, da importancia de que se complete o plan de paz do presidente dos Estados Unidos, Donald Trump.

Do mesmo xeito, defendeu que poida chegar axuda humanitaria sen problemas a Gaza e que as forzas israelís se retiren da Franxa e comece a reconstrución.

Tamén reclamou que se poña fin aos actos violentos en Cisxordania e a proliferación dos asentamentos israelís, ademais de se liberaren os fondos dos impostos palestinos que están bloqueados "sen ningunha razón".

Para Abás, a solución debe pasar pola vía dos dous estados cunha Palestina coas fronteiras de 1967.