Sánchez non ve unha deslealdade que Díaz lle esixa unha remodelación tras os casos de acoso

O presidente do Goberno, Pedro Sánchez, non considera unha deslealdade que a súa vicepresidenta segunda, Yolanda Díaz, lle pedira unha remodelación do Executivo ante os casos de acoso sexual e de corrupción que afectan ao PSOE. 

Na comparecencia de prensa que ofreceu esta madrugada en Bruxelas ao termo do Consello Europeo, o presidente desvelou que mantivo xa unha reunión con Díaz para comentar estas cuestións e que declinou a petición desta de facer cambios no seo do Goberno. Ao ser preguntado se considera unha deslealdade esa petición de remodelación, Sánchez dixo que non o ve desa forma.

Fontes do Executivo informaron de que a xuntanza entre o presidente e a vicepresidenta segunda se celebrou a principios desta semana, aínda que non aclaran se foi antes o despois da reunión do Consello de Ministros do martes.

Á súa chegada a Bruxelas, Sánchez subliñou que, a pesar das discrepancias lóxicas que existen entre o seu partido e Sumar, hai moitas cousas que os unen.

Sumar cualifica de útil a reunión entre Sánchez e Díaz e insisten en que a o inmobilismo non  é unha opción

Sumar destacou que a reunión entre o presidente, Pedro Sánchez, e a vicepresidenta segunda, Yolanda Díaz, foi "útil e proveitosa" e serviu para que esta lle trasladou "o momento de gravidade" que atravesa tanto a lexislatura como o Goberno.

Díaz salientou a conveniencia de remodelar o Goberno e a necesidade de relanzar a lexislatura cunha axenda social potente, sobre todo en materia de vivenda, para darlle un novo impulso á lexislatura. 

Desde Sumar insisten en que o PSOE ten que mover ficha ante a crise que xeraron os escándalos que salpican á formación e reiteran, como expresaron o martes, que o inmobilismo non é unha opción.

Sánchez defende a pulcritude do rescate de Plus Ultra ante as acusacións a Zapatero

O presidente do Goberno, Pedro Sánchez, defendeu este venres a pulcritude do rescate da compañía aérea Plus Ultra ante as acusacións das que está a ser obxecto o ex-xefe do Executivo, José Luis Rodríguez Zapatero. Este xoves a portavoz do PP no Senado, Alicia García, informou de que o seu grupo citou a Zapatero ante a comisión de investigación do caso Koldo, polas súas supostas conexións con directivos da aeroliña Plus Ultra investigados por un presunto delito de branqueo de capitais. 

Sánchez afirma que non tivo ocasión de falar con Zapatero, pero que sempre defendeu a pulcritude dos rescates, aínda que a continuación precisou que non foron rescates, senón préstamos dados ás aeroliñas durante a pandemia conforme á lexislación nacional e a todos os parámetros e esixencias requiridos polo Tribunal de Contas.

Ao seu xuízo, trátase dun debate recorrente e insistiu na total pulcritude do Goberno nesta cuestión.

Óscar López, ministro para a Transformación Dixital, defendeu hoxe ao seu compañeiro de filas, a quen define como unha persoa "íntegra" e "exemplar". "Os que están denunciando a José Luis Rodríguez Zapatero non lle chegan á solo do zapato", asegurou o tamén líder dos socialistas madrileños.

Pola contra, o secretario xeral do PP, Miguel Tellado, considera que o expresidente do Goberno é "a raíña nai de toda a corrupción socialista" e pregúntase "que facía reunido nun monte recóndito, sen cobertura, cun empresario escuro que tres días despois era detido pola Garda Civil polo escándalo de Plus Ultra".

Sánchez resta importancia a esperar un mes para o pacto UE-Mercosur: "Se esperamos 25 anos, podemos esperar 25 anos e un mes"

O presidente do Goberno español, Pedro Sánchez, restou importancia este venres a que sexa necesario esperar un mes máis para asinar o acordo entre a UE e Mercosur se é que finalmente se logra.

"Se esperamos 25 anos, podemos esperar 25 anos e un mes para asinar o acordo con Mercosur", dixo Sánchez na comparecencia de prensa que ofreceu tras o cume europeo despois de que os Vinte e sete decidisen pospoñer a xaneiro a firma dese acordo de asociación, que estaba prevista inicialmente para este sábado en Brasil, polas reticencias de Francia e Italia.

O xefe do Executivo resaltou a relevancia dese acordo e opinou que chegou o momento de culminar a negociación despois de 25 anos de conversacións e nos que houbo xa "demasiada paciencia" por parte de todos.

Explicou que pediu aos socios que aínda teñen dúbidas que aposten por unha Europa aberta e pola oportunidade que ese acordo ofrece ás empresas, sobre todo as pemes, ao conformar a zona de libre comercio máis importante do mundo, con 700 millóns de persoas e que, segundo as estimacións, suporía un aforro anual de máis de 4.000 millóns de euros en aranceis.

"Europa necesita ese acordo e o mundo necesita que Europa teña esa capacidade de chegar a acordos comerciais con outras economías".