Sánchez: "Con Besteiro á fronte da Xunta, Galicia non roda, Galicia voa!"

O presidente do Goberno e líder do PSOE, Pedro Sánchez, prognosticou que co seu candidato, Xosé Ramón Gómez Besteiro, á fronte da Xunta, "Galicia non roda, Galicia voa!", nun xogo de palabras co actual presidente do PPdeG, Alfonso Rueda.

Nun acto en Lugo con máis de 1.200 asistentes, explicou que "o 18 de febreiro todo vai depender deses galegos e galegas que non saben moi ben que facer, que están indecisos, non saben se ir votar e tampouco saben moi ben a quen votar".

Con todo, lembrou que "máis dun 70 % da poboación galega quere cambiar", polo que prognosticou que "se Galicia vota, Galicia cambia e hai moitas papeletas para o cambio en Galicia, pero só unha para gobernar o cambio, que é a de José Ramón Gómez Besteiro".

"Cun socialista en Moncloa e un socialista como Besteiro á fronte da Xunta, a partir do 18 de febreiro Galicia non roda, Galicia voa!", agregou.

Tamén reivindicou "a temperanza como xeito de facer política ante os insultos" que di que utiliza a oposición "para desmobilizar o electorado progresista". Neste sentido, criticou a "oposición desnortada e faltona" que ten enfronte "un Goberno cun rumbo claro".

"Loita contra o imposible"

O candidato á presidencia da Xunta defendeu a carreira ata o 18 de febreiro como "a loita contra o imposible" na que vaticinou que o PSdeG será capaz de "darlle a volta ás enquisas" -que o sitúan terceiro- como fixo no pasado, pois é o grupo "que marca historia e que marca futuro".

"Farémolo cunha receita básica e fundamental: 0 % de resignación e 100 % de ambición, de ambición e de ambición", declarou.