Pedro Sánchez: "O que a fai, págaa. Así foi durante estes últimos seis anos"
Pedro Sánchez: "O que a fai, págaa. Así foi durante estes últimos seis anos"
Díxoo no cumio da Internacional Socialista en alusión ao caso de Koldo García, que afecta o exministro Ábalos
Insistiu en que hai que manterse firme ante os posibles abusos "sexan da cor que sexan"
Pedro Sánchez interviu este sábado no cumio da Internacional Socialista cun caso molesto no retrovisor, o protagonizado por Koldo García e que fixa a atención mediática e política no exministro Ábalos. O líder do PSOE optou pola contundencia e asegurou que haberá colaboración absoluta coa xustiza, lembrando a orixe do seu Goberno.
"Un Goberno que naceu da necesidade de acabar coa corrupción da anterior administración do Goberno do Partido Popular. E quero ademais reafirmarme en que esa loita contra a corrupción ten que ser implacable, veña de onde veña e caia quen caia".
Como colofón, unha mensaxe para hipotéticos destinatarios.
"Transparencia absoluta hoxe e o que a fai, págaa. Así foi durante estes últimos seis anos".
Tamén se referiu aos conflitos internacionais. Reiterou o pedimento de dous Estados para Israel e Palestina e non aforrou críticas a Putin no segundo aniversario da guerra de Ucraína.
"O soño imperialista que non só arrasa un país, senón que afecta de cheo á estabilidade e á paz do conxunto do planeta. A comunidade internacional non pode abandonar á sua sorte a Ucraína".
Finalmente, reivindicou unha socialdemocracia comprometida cos dereitos civís, a revolución feminista, a ecoloxía e a dignidade laboral.