Baile de fichaxes na 1ª RFEF a escasas horas do peche do mercado

O Deportivo ficha experiencia con Salva Sevilla (39 anos). Un xogador que se especializou en ascensos de categoría. Logrouno co Sevilla Atlético e co Mallorca de Segunda B a Segunda A e co Betis, Alavés (hai uns meses) e Mallorca (en dúas ocasións) a Primeira División. 

Con moitos partidos en Primeira (oito temporadas na máxima categoría) Salva Sevilla é un centrocampista que pode achegar moito gol. Ao longo da súa traxectoria anotou 67 tantos e foi capaz de dotar a todos os equipos da súa competitividade e calidade. 

Baixa de Isi Gómez

Hai uns días era Kuki Zalazar o que abandonaba Riazor con destino ao Córdoba. Esta mañá o Deportivo confirmou a baixa de Isi Gómez. O centrocampista deixa unha ficha de marxe para acometer algunha incorporación máis antes do peche do mercado. 

Jozabed asina no Lugo

O Lugo tamén apura as horas para reforzar o cadro de xogadores. Este xoves presentou a Antoñín Cortés, un dianteiro con bos números na Segunda División (Raio e Málaga) e que xogou o ano pasado na Primeira Liga co Guimaraes. Tamén incorpora experiencia no centro do campo con Jozabed. O ex xogador do Celta estaba libre logo de rematar o contrato co Málaga.