Rueda, sorprendido ante os "cualificativos tan duros" da oposición ao seu primeiro ano no goberno

O presidente da Xunta, Alfonso Rueda, asegurou este martes, no primeiro aniversario da súa vitoria electoral, que "non esperaba aplausos" da oposición, aínda que os cualificativos lle pareceron demasiado "duros" e insta o resto de partidos a "ser construtivos".

Nun acto en Arteixo, Rueda di que chega a este aniversario con "obxectivos cumpridos".

Declarou que continuará con "moita humildade e recoñecendo fallos" porque cre que "nisto consiste o traballo da política" fronte a outros que expoñen "discutir moitísimo e facer moito ruído".

Ao preguntarlle polas críticas da oposición a este primeiro ano, pois tanto o BNG como o PSdeG coinciden en que non hai nada que celebrar, recoñeceu que "non esperaba aplausos".

Con todo, detallou que está sorprendido polos "cualificativos tan duros", que enmarca en que "non entenderon o resultado electoral ou non o aceptaron".

"Ser un pouquiño máis construtivos ou un pouquiño máis útiles estaría ben", indicou respecto ao resto de partidos.

A partir de agora "quedan aínda tres anos", dixo, e citou varios retos para o Goberno galego nese período: vivenda; investigación, desenvolvemento e innovación; acceso universal e gratuíto a servizos básicos; e "non perder ningunha oportunidade industrial das que cumpran todos os requisitos".

"Dicíao na noite electoral: toca seguir traballando e empezar unha nova etapa", proseguiu e afirmou que xa ten dous terzos das medidas do seu programa electoral avanzadas, entre as que están executadas e as que comezaron.

No acto, agradeceu o "labor social" das empresas galegas que deciden investir parte dos seus beneficios en obra social.

Fronte a quen cre que ese traballo corresponde só ás administracións, Rueda dixo que "pensar iso significaría quedar curto" en todo o que hai que facer.