Rueda pide ao sector privado "implicación" na fundación para atraer investigadores
Os centros da Rede CIGUS celebraron este martes unha xornada para facer "apoloxía da ciencia feita en Galicia"
O presidente da Xunta, Alfonso Rueda, pídelle ao sector privado que "se implique" na fundación que a administración galega vai poñer en marcha este ano para reter e atraer investigadores. Díxoo no acto que organizou este martes o Goberno galego para recoñecer a "excelencia" dos centros da Rede CIGUS (Centros de Investigación do Sistema Universitario de Galicia).
O CIGUS está formado por dez centros, que hoxe fixeron "apoloxía da ciencia feita en Galicia", que estudan como mellorar a vida ou a competitividade das nosas empresas, dende a investigación dos océanos ou a biomedicina ata a ciberseguridade. Neste acto, o reitor da Universidade de Santiago, Antonio López, pediu para estes centros un financiamento estrutural, con maior participación do sector privado.
Demanda que comparte o presidente Alfonso Rueda, que insta as empresas a apoiar a fundación para atraer talento que vai crear a Xunta este 2025, e que é unha das medidas do plan galego de I+D, no que a Xunta vai investir 1.310 millóns de euros nos próximos tres anos. "Ten que implicarse nesta fundación para estar á altura no mundo tan competitivo que é atraer talento de fóra", dixo o presidente.
