Rueda cre que a declaración contra a cota catalá se vai estender a outros territorios

O presidente da Xunta Alfonso Rueda cargou este sábado contra a "cota catalá" e amosouse convencido de que outros territorios poderían sumarse á declaración institucional asinada con Estremadura en rexeitamento do financiamento singular de Cataluña.

Segundo o mandatario galego, a condonación da débeda que quere aprobar o Goberno de Sánchez é produto tamén doutra extorsión separatista, polo que a declaración asinada este venres xunto á presidenta estremeña María Guardiola vai estenderse a outros territorios.

"A maioría ten a mesma posición sobre o que está a suceder respecto á posible cota catalá".

Durante unha visita ao aeródromo militar de Santiago, asegurou que hai comunidades socialistas que pensan exactamente igual; con todo, dubidou que teñan permitido dicilo, por iso, instounas a elevar a voz. 

"Non vale dicir que se pode experimentar en todas as comunidades autónomas porque non é certo, está deseñado para Cataluña porque o está pedindo o independentismo para seguir apoiando a Pedro Sánchez, e se o queren facer así, por algo será", reflexionou.

Con todo, cuestionou tamén a postura do BNG e do PSdeG respecto a este asunto pois, segundo subliñou, o sistema de concerto sería absolutamente prexudicial para Galicia.

Doutra banda, tamén tivo palabras para o presidente catalán Salvador Illa, ao que lembrou que as cifras son de expertos independentes. Tamén o criticou por ir aos territorios prexudicados a dicir que isto é algo que lles convén.