Rueda anima os brasileiros a vivir a experiencia do Camiño de Santiago no Xacobeo 27

O presidente da Xunta, Alfonso Rueda, presentou este martes o Xacobeo 27 no Río de Xaneiro e animou a todos os brasileiros a visitar Galicia e vivir a experiencia de peregrinar a Santiago a través dos diferentes camiños.

Tal e como informou a Xunta, máis de 564.000 peregrinos recolleron a compostela no que vai de ano, superando xa a marca histórica do 2025. Deles, máis de 8.300 procedían do Brasil, que ocupa o undécimo lugar como país de orixe dos turistas que realizan o Camiño.

O presidente da Xunta tamén asistiu á reunión de peche de mandato da Comisión Delegada do XIII Consello de Comunidades Galegas, onde Rueda quixo agradecer o traballo que levan a cabo os centros galegos distribuídos por todo o mundo e que forman parte do devandito Consello. Este mércores reúnese tamén o seu Plenario.

Cabe destacar que o país anfitrión para esta cita, O Brasil, é o segundo do mundo con maior presenza galega, con máis de 55.000 galegos residentes. A cita tivo lugar na Associação Recreio dos Anciãos para Asilo da Velhice Desamparada.