Rubén Albés volve a Lugo onde se sentiu "moi valorado e querido"
Logo de temporada e media moi exitosa no Anxo Carro comeza a temporada co Albacete nun partido de forte contido sentimental
Rubén Albés regresa á que foi a súa casa a última temporada e media. Un periplo exitoso coa permanencia agónica en 2021 cando ninguén daba un euro polo Lugo e coa gran 21-22 na que acadou o obxectivo de manterse en Segunda con moitas xornadas de marxe.
O adestrador de Vigo decidiu cambiar de aires, non renovou o contrato e aceptou a proposta do Albacete no que tentará construír algo similar ao que logrou en Lugo.
O destino quixo emparellar a Lugo e Albacete na primeira xornada do campionato. "Sentinme moi valorado e querido polos futbolistas, o club e a afección" recoñeceu Albés na previa do partido. Tamén advertiu da filosofía do cadro das murallas porque sexa quen sexa o técnico "teñen un nivel de competitividade extremo".
