Roubos e actos vandálicos no campo de fútbol do Berres
O campo do Club Deportivo Berres, na Estrada, volveu ser obxectivo dos ladróns. Desta volta, rebentaron a porta de entrada que dá acceso ao material deportivo do club.
Amais dos danos materiais, levaron unha ducia de balóns valorados cada un deles nuns 30 euros
Os ladróns accederon por un lateral do campo do Berres, xusto nunha das moitas zonas onde as redes están rotas. Unha vez dentro e dunha patada rebentaron esta porta de madeira con acceso ao material deportivo.
Para o presidente deste equipo, Marcos Lorenzo Carballude, este novo acto vandálico, supón un novo desembolso económico para un club moi modesto. O mantemento deste campo de Pardiñeiro corre a cargo do Concello da Estrada, por iso pídenlle o consistorio un peche adecuado para que estes feitos non se repitan.
Este roubo non foi denunciado, din, que non lles compensa. Con todo, piden máis respecto a quen puidese estar detrás destes actos vandálicos.
Tamén forzaron sen éxito a porta de acceso á maquinaria. De feito, a zona de oficinas conta con enreixado para evitar máis sustos. Non desbotan a colocación de cámaras de videovixilancia.
