Aumentan os contaxios da covid e a incidencia nos maiores de 60 anos sobe 100 puntos
O aumento dos contaxios non se reflicte na mesma proporción nos hospitais
Entramos no verán cunha repunta dos contaxios da covid. Sobe a incidencia nos maiores de 60 anos en case cen puntos. A media de España elévase a 755 casos por cen mil habitantes e a de Galicia a 938.
E aínda que tamén aumentan os ingresos, fano en menor proporción que os contaxios. Segundo os datos do Sergas, Galicia ten dous mil casos de covid máis que o luns pero menos enfermos ingresados que a principios de semana.
Do informe semanal sobre a covid do Ministerio de Sanidade tamén se tira que Galicia segue de primeira na vacinación pediátrica. Teñen posta a pauta completa o 68 % dos nenos e nenas fronte o 44 % da media española.
Sen o efecto das vacinas, as hospitalizacións multiplicaríanse cos actuais niveis de contaxio. A dose de reforzo reduce os ingresos pero tamén a sintomatoloxía dos que se infectan.
As principais farmacéuticas xa agardan o aval das axencias reguladoras para sacar o mercado as vacinas que inmunizan tamén contra as novas variantes do virus. Pero na comunidade científica hai quen aposta por cambiar a estratexia de vacinación.
"Combinar vacinas pode ser unha boa estratexia. Ao mellor é bo non seguir insistindo mostrándolle a mesma foto do inimigo aos soldadiños. Mostrar unhas fotos diferentes pode facer que a inmunidade sexa máis ampla", reflexiona África González, catedrática de inmunoloxía da Universidade de Vigo.
E apunta á posibilidade, por exemplo, de introducir a vacina española de HIPRA ou a de Novavax que son recombinantes e axudarían a aprenderlle outras cousas ao sistema inmune, segundo esta inmunóloga.
Outros científicos como Luis Enjuanes cren que, ao tratarse dun virus respiratorio, o ideal sería poder administrar as vacinas por vía intranasal en vez de inxectalas.
"Multiplicariamos a eficacia das mesmas vacinas que xa existen polo menos por cen simplemente administrándoas intranasalmente", di o virólogo e investigador do CSIC.
Xa hai países que utilizan vacinas intranasais nas campañas contra a gripe común estacional.
