Repsol formaliza co porto coruñés o traslado da súa terminal a Lagosteira en 2027
A empresa investirá 140 millóns de euros para completar o traslado
O presidente de Repsol e o presidente da Xunta coinciden en que Galicia "sen industria non hai futuro"
Repsol e o Porto da Coruña presentaron o acordo polo que a empresa investirá 140 millóns de euros para completar o traslado da súa terminal marítima da dársena interior da Coruña ao Porto Exterior de Punta Lagosteira, en Arteixo, que terá que estar terminado en 2027.
Este venres celebrouse na Coruña o acto de presentación do convenio asinado para estas obras, unha segunda fase que se suma á primeira, cun orzamento global de 260 millóns euros, e que supoñerá prorrogar 15 anos a concesión de 35 anos outorgada para a instalación inicial no porto exterior.
O acto estivo presidido polo presidente de Repsol, Antonio Brufau, e o da Autoridade Portuaria da Coruña, Martín Fernández Prado, e contou coa participación do presidente da Xunta, Alfonso Rueda; os alcaldes da Coruña e Arteixo, Inés Rey e Carlos Calvelo; o secretario de Estado de Transportes, José Antonio Santano, e a directora do Complexo Industrial de Repsol na Coruña, Natalia Barreiro.
Brufau cualificou este acordo como "un gran paso para Galicia e o seu futuro económico e industrial" e, á parte de destacar que se trata "dun exemplo de colaboración público-privada", dixo que representa máis que un proxecto de enxeñería "unha decisión estratéxica" que mostra o "triplo compromiso" de Repsol coa comunidade galega, coa Coruña e co futuro do sector industrial.
"Sen desenvolvemento industrial non hai nada disto", asegurou Brufau, en referencia a que Galicia é a "sexta maior economía de España", cun 18 % do PIB que corresponde ao sector industrial, e tras resaltar que o complexo industrial de Repsol na Coruña supón 1.000 empregos directos e 3.000 inducidos.
O presidente da Xunta coincidiu con Brufau en que "sen industria non hai futuro", e lamentou que é algo que "a algúns lles custa moito entender" e din "non a diario a calquera iniciativa" co que "fan moitísimo dano" ao desenvolvemento e ao futuro de Galicia.
Rueda considerou este acordo para completar o traslado da terminal de Repsol ao porto exterior como unha mostra de que "somos capaces de pechar un ciclo moi prometedor" coa colaboración público-privada para "conseguir moitas cousas a partir de agora", polo que criticou a quen se empeña en "demonizar" esta cooperación.
