Redúcense as infeccións e os positivos en Galicia pero soben os ingresos

Nos últimos días semellaba que se comezaba a notar a incidencia das festas do Entroido nos indicadores da situación da pandemia de coronavirus en Galicia. Pero a tendencia cambia este domingo e rexístrase unha lixeira melloría nos datos, agás nas hospitalizacións, que incrementan nas últimas horas.

Desta maneira son 17.023 as persoas co virus activo en Galicia, que son 84 menos que o día anterior, cos datos recollidos ata as 18 horas do sábado. Tamén melloran as cifras canto a contaxios diarios detectados nas probas realizadas e son 1.638 (-297).

O contraste aparece no que atinxe á presión asistencial, que aumenta nas últimas horas. Hai 426 pacientes con covid nos hospitais galegos, que son nove máis que 24 horas antes. O maior incremento de enfermos esta en planta, con 395 persoas ingresadas (+8) e outras 31 precisan UCI (+1).

O Sergas notifica catro falecementos máis por covid, o que eleva a cifra de mortes en Galicia a causa da pandemia a 3.125 persoas.

Situación por áreas sanitarias

As infeccións activas soben nas xerencias de Ourense e de Ferrol, aínda que de xeito lixeiro, e baixan no resto. Só pasan xa dos tres mil casos activos A Coruña, Vigo e Santiago, e Ferrol é a única que se sitúa por baixo dos mil. Nas UCI os peores datos están en Santiago, con oito enfermos por covid nestas unidades especializadas, e nos hospitais da Coruña, con sete.

A Coruña: 3.350 (+80)

Vigo: 3.157 (-144)

Ourense: 2.239 (+50)

Santiago: 3.017 (-76)

Lugo: 2.107 (-18)

Pontevedra: 2.090 (-4)

Ferrol: 983 (+31)

Mapas de incidencia