Recollen sinaturas para que se prohiba fumar no parque Rosalía de Castro de Lugo

O martes 31 de maio celebrouse o Día Mundial Sen Tabaco. No parque Rosalía de Castro, en Lugo, representantes da Asociación Española contra o Cancro (AECC) recollían sinaturas pedindo que esta zona verde sexa un espazo libre de fume.

A mesma situación se viviu noutras trinta e nove localidades españolas nas que tamén se solicitou a prohibición de fumar en determinados espazos públicos que dependen da Administración local.

Cada ano morren no mundo oito millóns de persoas polo tabaquismo, sete millóns polo consumo directo e un millón polo indirecto. O tabaco é a primeira causa de morte que se podería previr.
Fumar causa o 30 % de calquera tipo de cancro.

O fume tamén orixina esta enfermidade, xa que contén máis de 70 substancias canceríxenas. A AECC considera que a lei actual é insuficiente para protexer a poboación española do tabaco nos espazos abertos.

A recollida de sinaturas para prohibir o tabaco en espazos emblemáticos continúa aberta nas redes sociais coa intención de presentalas nos concellos correspondentes o máis axiña posible.