Raquel Carrera, operada con éxito da rotura de ligamento cruzado anterior
Raquel Carrera, operada con éxito da rotura de ligamento cruzado anterior
A galega, de 22 anos, perderase seguro o que resta de tempada e tamén os Xogos Olímpicos de París 2024
A pivote galega Raquel Carrera foi intervida este martes con éxito da rotura do ligamento cruzado anterior do xeonllo dereito sufrido hai trece días no encontro de Copa da Raíña ante o IDK Euskotren.
O Valencia Basket informou este mércores nun comunicado que Carrera foi operada "con éxito" polo doutor Ramón Cugat en Barcelona e que, tras esta intervención, a xogadora iniciará "canto antes" o seu proceso de recuperación para regresar á pista.
Carrera, de 22 anos, perderá seguro o que resta de tempada e tamén os Xogos Olímpicos de París 2024, para os que España se clasificou hai unhas semanas no Preolímpico de Hungría, en que a pivote foi a xogadora que máis minutos disputou.
