Rafa Benítez: "Os nosos camiños sepáranse antes do esperado"

Rafa Benítez lamentou este mércores a súa destitución como adestrador do  Celta a través dunha carta publicada nas súas redes sociais, na que lembra que deixa ao equipo “fóra da zona de descenso” e na que di estar convencido de que logrará o obxectivo da permanencia.

“Marchamos defendendo en todo momento o club, o proxecto e os xogadores. Sabendo que cometemos erros, non hai que esquecer de onde partiamos, onde queriamos chegar e todo o que nos ocorreu polo camiño. Por iso, estar fóra da zona de descenso mantiña a nosa confianza intacta”, escribiu o técnico madrileño.

Benítez, ademais, di estar “convencido” de que “co mesmo compromiso e esforzo” que mostraron os xogadores durante estes meses o equipo acabará evitando o descenso a tempada do seu centenario.

“Os nosos camiños sepáranse antes do esperado. Como repetín desde que cheguei a Vigo, vin moi ilusionado para axudar a desenvolver un proxecto de tres anos pero, nunha época de cambios constantes, o club decidiu terminar esta relación”, critica.

Agradece á presidenta, Marian Mouriño, e ao director deportivo, Marco Garcés, a “confianza” que mostraron no seu traballo, así como ao expresidente Carlos Mouriño e a Luis Campos por confiar nel e o seu corpo técnico inicialmente.

“Desexando moitos éxitos futuros para o Real Club Celta de Vigo, despídese agradecido un celtista máis”, conclúe Rafa Benítez.

Buena suerte @RCCelta 🩵 pic.twitter.com/odcvRlxokA

— Rafa Benitez (@rafabenitezweb) March 13, 2024