Quintero e Alcaina, xuventude para revitalizar a dianteira do Deportivo

Os malos rexistros goleadores na primeira parte do campionato facían prioritario reforzar as posicións de ataque. Xusto antes do final do mercado confirmáronse as dúas incorporacións para solucionar ese problema. 

Ao contrario que no mercado de verán, en que o club tirou de experiencia, neste mercado invernal apostou pola xuventude para que salte a faísca que precisa o seu ataque. Raúl Alcaina é un dianteiro centro formado na canteira do Levante que nas últimas temporadas estivo no Alcoyano. 

Luis Quintero (19 anos) ten familia na Coruña e acreditou que era un soño para el poder xogar no Deportivo. Estaba no Amorebieta cedido polo Vilarreal, o club en que se formou, pero anunciou o final da súa relación co equipo vasco de Segunda División para enrolarse no Deportivo ata o remate do campionato.