Quiles: "A Lucas e a min xa nos chaman Batman e Robin"

Alberto Quiles, compareceu na cidade deportiva de Abegondo. O dianteiro, aínda cos signos da lesión e a operación posterior moi visibles na parte esquerda do seu rostro, recoñeceu sentirse ben:

"Por sorte non teño dores, as noites estou a pasalas ben. O único, ao mastigar algo duro e tragar, teño unha molestia, pero ben. Ademais, xa vexo case ben", explicou. 

Insistiu que mantén como obxectivo chegar a xogar uns minutos na última xornada de liga do próximo día 27 contra o Pontevedra:

"Non fai nin unha semana que me operei e xa case non teño dores, estou a empezar traballos de ximnasio e todo vai fenomenal, así que sigo mantendo ese prazo".

O dianteiro, que sufriu unha dobre fractura na cara nun lance do partido da pasada semana en Córdoba pola que tivo que ser operado na Coruña, está pendente de comezar a adestrarse cunha máscara protectora:

"De momento non probei nada. Recólloa a finais desta semana ou principio da outra vou empezar con ela, e a ver que tal", engadiu.

Ademais, cualificou como "de mala sorte" que, poucos días despois da súa importante lesión, Lucas Pérez tamén rompese un óso da cara no partido contra o Alcorcón:

"Vai ser algo anecdótico, porque as dúas fracturas na cara non adoitan suceder, pero foi mala sorte. Agora só queda recuperarse e axudar ao club", dixo. 

Destaca o que lle axudan as bromas do vestiario, que coa lesión de Lucas Pérez, tamén na cara, xa non son individuais:

"Agora xa non me chaman esquío, está a cambiar a Batman e Robin. Agora co de Lucas pasou a Batman e Robin".

Respecto da situación do Deportivo, que segue cuarto clasificado a catro puntos do líder cando só quedan tres xornadas por disputar, Quiles insistiu en que, mentres haxa posibilidades matemáticas, hai que ir gañar os máximos puntos posibles para ascender: 

"É complicado, porque deben errar varios e algún ata dúas veces. Se non é directo, será polo playoff. O ano pasado foi un pau duro, pero este ano non ten por que ser así», apuntou.

Ademais, Alberto Quiles referiuse á rifa en contra de Óscar Cano o pasado sábado en Riazor:

"É unha situación que a ninguén lle gusta. Ao final, á xente que gasta o seu diñeiro nun abono e o seu tempo en vir verte hai que respectala. Nós estamos convencidos de que haberá ascenso, e só podemos dicir que á afección que anime como o está facendo. Hai que intentalo ata o final", subliñou.