O abuso no uso das prazas de carga e descarga xera queixas en Ourense

A ocupación indebida das zonas de carga e descarga volve xerar queixas entre os repartidores e os comerciantes. En Ourense quéixanse de que por exemplo, non poden estacionar diante dos supermercados porque sempre teñen as prazas ocupadas por particulares.

Ademais de ser un problema de falta de civismo entre os condutores, a ocupación indebida da carga e descarga afecta á mobilidade e á seguridade viaria. 

"En Ourense, por exemplo, a carga e descarga está case sempre ocupada diante dos supermercados. Un problema que se suma á queixa dos condutores da falta de aparcadoiros públicos. Por que? Porque precisamente o que ten que facer a utilización desa carga e descarga, que é o transportista, o camión, a furgoneta, pois ten que invadir a calzada", explica Daniel Rey, o responsable de seguridade do Concello ourensán de Barbadás. 

Que os repartidores non teñan o seu espazo libre tamén afecta os comerciantes. Estas zonas están estratexicamente situadas e pensadas para facilitar o traballo dos profesionais e así evitar problemas de tráfico. E a lei contempla multas por unhas sanción grave. 

"A sanción por aparcar en zona de carga e descarga son 200 euros; co pronto pago son 100 euros. É unha sanción que reflicte a necesidade de deixala libre para a fluidez e a seguridade do tráfico", asegura Daniel Rey. 

"Teñen que ser un pouco máis conscientes e empatizar un pouco máis cos traballadores que repartimos", indica un repartidor de mercadorías diante dun supermercado no barrio ourensán da Ponte. 

"É triste non ter onde a aparcar, pero é en xeral non só en Ourense", afirma unha veciña.