PSOE e Podemos descartan o adianto electoral tras o revés nas urnas andaluzas

O Goberno central descarta un adianto das eleccións tras os resultados en Andalucía. A intención do PSOE é esgotar os catro anos da lexislatura e culminar o mandato. 

No partido algunhas voces comezan a chamar para facer un proceso de autocrítica. Piden unha revisión interna para reconectar co electorado socialista que non os votou. 

A desfeita nas urnas preocupa os socios parlamentarios do Goberno de Pedro Sánchez, que reclaman máis políticas de esquerdas. 

En Podemos manteñen o silencio despois de dous días da celebración das eleccións andaluzas, en que Yolanda Díaz participou en distintos actos de campaña arroupando a formación de Inma Nieto, Por Andalucía. 

Gobernar ata o final da lexislatura

A vicepresidenta segunda do Goberno asegurou este martes que está triste polos resultados das eleccións do domingo en Andalucía aínda que deixou claro que gobernarán ata ao final da lexislatura.

A portavoz do Executivo, Isabel Rodríguez, aseguraba desde a mesma mesa que compartía con Yolanda Díaz, na conferencia de prensa tras a reunión do Consello de Ministros, que o Goberno está "en plena forma".

Yolanda Díaz non quixo facer unha valoración expresa dos resultados obtidos pola súa formación e pola esquerda nas eleccións andaluzas a pesar das reiteradas preguntas dos xornalistas. Pero si dixo que estaba triste por que gañase o Partido Popular porque, segundo ela, se gobernase o PP non subirían as pensións co IPC e habería recortes de gasto público en Educación e Sanidade.

A tamén ministra de Traballo advertiu de que a intención do Goberno é seguir aprobando leis "para mellorar a vida das españolas e os españois" ata esgotar a Lexislatura e advertiu ademais que "queda o mellor por vir".

Isabel Rodríguez, pola súa banda, deslindou as eleccións autonómicas das xerais, á vez que reafirmaba a acción do Executivo para loitar contra a inflación e reivindicaba as medidas que adoptou contra as consecuencias da guerra.