Prohibido bicarse
No Día Internacional do Bico lembramos que hai culturas que penalizan as mostras públicas de afecto
O bico é unha das máis grandes manifestacións de afecto, pero non todas as culturas o consideran igual. Bicarse na rúa está prohibido en moitos países, sobre todo árabes, algo que debemos ter en conta á hora de viaxar.
"Algunha vez chamáronos a atención no caso de Xordania e entón ao final nós creo que temos a tendencia a adaptarnos ao lugar ao que imos e esas mostras de cariño non facelas en exterior, máis ben na intimidade para non ofender a ninguén", comenta unha rapaza
En Occidente resultan chocantes estas normas tan estritas.
"Porque un bico debería ser libre para todo o mundo e con quen quixeras", apunta outra.
Aquí somos máis dados ás mostras de afecto en público. Pero non sempre foi así. Durante o franquismo estaban socialmente estigmatizadas e en moitos casos reprimidas polas autoridades.
"Cando eramos novos víase moi mal poñerte a bicarte e a 'morrear' diante da xente, entón tiñas que agocharte", lembra unha señora.
En Francia e en Londres, prohibíronse nas estacións de tren para axilizar o tránsito dos pasaxeiros que se eternizaban en longas despedidas. E hai outra prohibición, esa témola todos na memoria.
"Xa estivo case prohibido cando foi da pandemia xa non se podía bicar nin sequera a un familiar, así que xa sabemos o que é" , conclúe.
