Prisión para os acusados de intentar asasinar a expresidenta arxentina Cristina Fernández
Fernando Sabag foi condenado a 10 anos de cadea e Brenda Uliarte, daquela a súa parella, a 8 anos
Fernando Sabag, condenado como "autor do intento de homicidio". Reuters
Os acusados por tentar asasinar a expresidenta arxentina Cristina Fernández (2007-2015) o 1 de setembro de 2022, Fernando Sabag Montiel e a súa entón parella, Brenda Uliarte, foron condenados este mércores a dez e oito anos de prisión, respectivamente.
Sabag Montiel, de 37 anos, foi condenado a dez anos tras ser considerado "autor penalmente responsable do delito de homicidio agravado por mediar o emprego dunha arma de fogo, en grao de tentativa, e con concurso ideal co delito de tenza de arma de guerra sen a debida autorización legal", segundo expresou a xuíza Sabrina Namer, presidenta do Tribunal Oral no Criminal Federal número 6.
Uliarte, acusada por prestar colaboración a quen entón fose a súa parella, foi condenada a oito anos de prisión por considerala "partícipe necesaria penalmente responsable do delito de homicidio agravado por mediar o emprego dunha arma de fogo, en grao tentativa".
Brenda Uliarte condenada por ser "partícipe necesaria". Reuters
Nicolás Carrizo, considerado inicialmente como o presunto líder do grupo e liberado da súa prisión preventiva en agosto de 2024 por falta de probas, foi absolto polo tribunal.
O intento de asasinato foi o 1 de setembro de 2022
Sabag Montiel activou aquel día unha arma cargada e apta para o disparo a escasos centímetros do rostro de Fernández, sen que o disparo se efectuase por un fallo da arma.
Tras admitir na audiencia inicial do xuízo, o 26 de xuño de 2024, que "quería matar a Cristina", o principal acusado denunciou este mércores na súa declaración final que a causa na súa contra "estivo armada", en referencia a que foi unha montaxe.
Uliarte, pola súa banda, decidiu non falar ante o tribunal e Carrizo criticou a demora da Xustiza: "Os tres anos que pasei preso ninguén mos vai a devolver", expresou.
O intento de asasinato ocorreu fronte ao domicilio da entón vicepresidenta en Bos Aires, mentres simpatizantes lle expresaban o seu apoio durante un xuízo por presuntas irregularidades na concesión de obras durante o seu mandato. Nesa causa, Fernández foi finalmente condenada en xuño deste ano a seis anos de prisión -que cumpre no seu domicilio- e inhabilitación perpetua para exercer cargos públicos.
