Presentan a primeira calculadora científica que inclúe o galego na súa configuración
As carcasas das calculadoras terán ademais as imaxes de 17 mulleres científicas
O secretario xeral de Política Lingüística, Valentín García, presentou xunto ao director xeral de Casio en España, François Vilaprinyó, a primeira calculadora científica que inclúe a lingua galega na súa configuración e manual de instrucións.
A calculadora estará dispoñible a partir do 1 de xuño.
O dirixente autonómico destacou a importancia de promocionar a lingua propia no ámbito científico a través da súa incorporación nas tecnoloxías e anunciou uns obradoiros para que os profesores a coñezan.
Mulleres científicas
Outro dos aspectos destacados da presentación foi a visibilización das mulleres científicas que cobran protagonismo grazas a 17 artistas que deseñaron 17 ilustracións de distintas mulleres nas carcasas das calculadoras.
Un proxecto que nace co obxectivo de romper os estereotipos de xénero e achegar referentes femininos e recursos educativos ás aulas.
A última incorporación é a imaxe da doutora e enxeñeira informática galega Ana Freire, líder do proxecto STOP, de prevención de suicidios.
No seu caso, a ilustración foi deseñada pola artista Lula Goce.
Freire explicou o funcionamento deste programa, que xera un algoritmo para detectar comportamentos suicidas, depresión ou trastornos alimentarios a través da actividade das persoas en redes sociais e pon en marcha campañas de prevención orientadas a eses perfís localizados.
