Piden explicacións ao alcalde de Ourense por escoller un condenado por abusos sexuais para facer de Baltasar

Os grupos municipais de PSOE e BNG solicitaron con carácter urxente unha xunta de voceiros no Concello de Ourense para que o alcalde, Gonzalo Pérez Jácome, ofreza "explicacións" por seleccionar un home condenado en dúas ocasións por abusos sexuais para facer de Baltasar na cabalgata de Reis.

O primeiro en facelo foi o Bloque, que este mesmo luns rexistrou un escrito para a convocatoria urxente da xunta de portavoces dada a "ampla polémica e alarma social" suscitada por este episodio.

Son uns feitos que o BNG considera "moi graves", polo que espera que o Goberno local achegue "explicacións sobre cal foi o procedemento seguido á hora de escoller ás persoas participantes na comitiva e os motivos polos cales non se esixiu" a documentación de non contar con antecedentes por delitos sexuais que esixen as leis para participar en actividades con nenos.  

A esta petición adheriuse o PSdeG-PSOE. A súa voceira municipal en Ourense, Natalia González, insistiu na necesidade de que o alcalde ofreza unha "comparecencia pública e urxente". E é que o ocorrido coa cabalgata é "un escándalo máis ao que non queremos estar afeitos".  

A socialista tachou de "gravísimo" que un dos integrantes da comitiva "fose seleccionado posiblemente a sabendas dos seus antecedentes, porque é unha persoa coñecida en Ourense.

O home que fixo de Baltasar o pasado 5 de xaneiro foi xulgado e condenado en dúas ocasións -2019 e 2022- por dous delitos de abusos sexuais, polos que tivo que pagar senllas multas económicas.

Podemos Ourense emitiu nun comunicado no que insta a Fiscalía Provincial e o Consello de Contas a investigar a contratación deste condenado para facer de Baltasar.