Os Tedax mobilízanse en Vigo por unha maleta abandonada na porta do hospital
Os axentes activaron o protocolo habitual: detiveron o tráfico e estableceron un perímetro de seguridade
Finalmente, tratouse dunha falsa alarma posto que no interior da maleta non había máis que roupa, segundo fontes da Policía Nacional
Arquivo TVG
Axentes especializados en explosivos da Policía Nacional (Tedax) acudiron á primeira hora da mañá deste venres ao hospital Álvaro Cunqueiro, en Vigo, alertados por unha maleta abandonada ás portas de Urxencias.
Ante a posibilidade de que a maleta escondese un artefacto explosivo, os axentes activaron o protocolo habitual: detiveron o tráfico e estableceron un perímetro de seguridade, ante a estrañeza dos condutores, que viron detida a súa marcha nas inmediacións do hospital.
Finalmente, tratouse dunha falsa alarma posto que no interior da maleta non había máis que roupa, segundo fontes da Policía Nacional.
A alarma saltou sobre as oito da mañá, cando unha persoa deixou a maleta ás portas de Urxencias, colleu un bolso de cintura e abandonou o lugar deixando alí a maleta.
Apenas media hora despois a normalidade regresou ás inmediacións do hospital unha vez os axentes comprobaron que se trataba dunha falsa alarma.
