Os reis visitarán este xoves as zonas afectadas polos incendios na comarca de Verín

Os reis visitarán este xoves diversas zonas de Galicia afectadas polos incendios forestais deste verán. Percorrerán os municipios ourensáns de Verín, Cualedro e Monterrei e reuniranse con alcaldes e outras autoridades, así como con veciños e gandeiros afectados polas lapas.

Segundo informan fontes da Casa Real, Filipe VI e dona Letizia chegarán ao mediodía ao Centro de Coordinación do Distrito Forestal XIV en Verín para visitar a sala de control dos incendios e saudar alcaldes de localidades afectadas na provincia de Ourense.

Alí tamén saudarán a representantes dos distintos equipos que desenvolveron o seu labor ante esta situación de emerxencia.

Despois desprazaranse a Cualedro, onde estarán nunha explotación gandeira e manterán un encontro con propietarios afectados.

Xa sobre as dúas da tarde, visitarán a parroquia de Medeiros, en Monterrei, para reunirse nun colexio público cunha representación de veciños afectados polos incendios, cos que teñen previsto estar arredor dunha hora.

A visita a Galicia forma parte do percorrido que as súas maxestades están a facer estes días polas zonas máis afectadas pola onda de incendios en España deste verán, que hoxe mércores os leva a Castela e León e o venres, a Estremadura.