Os EUA vetan unha resolución para propiciar a entrada de axuda humanitaria en Gaza

Os Estados Unidos vetaron en solitario unha resolución para propiciar a entrada de axuda humanitaria en Gaza, un texto que fora presentado polos dez membros non permanentes do Consello de Seguridade da ONU.

Os outros catorce membros do Consello votaron a favor dunha resolución que só contiña tres demandas: cesamento do fogo, liberación dos reféns en mans de Hamas e facilitar a axuda humanitaria a grande escala na Franxa de Gaza.

O texto levaba dúas semanas negociándose entre os quince membros do consello ata alcanzar "un razoable consenso", como dixo o representante de Eslovenia, Samuel Zbogar.

Nunha intervención previa á votación, a representante interina dos Estados Unidos, Dorothy Shea, xustificou o veto do seu país porque considerou que unha resolución así "é inaceptable polo que di e o que non di". 

"É inexplicable que moitos membros deste consello sigan negándose a recoñecer que Hamas podería terminar mañá mesmo este conflito se se rende e abandona as súas armas. É inconcibible que a ONU aínda non cualificase a Hamas como organización terrorista", abundou Shea.

Para a diplomática, esa resolución "establecería unha falsa equivalencia entre Israel e Hamas, o que é incorrecto e perigoso".

A embaixadora británica, Barbara Woodward, utilizou unha linguaxe dura con Israel por restrinxir a entrega de axuda humanitaria, e dixo que disparar a palestinos que esperan coas súas familias para recoller axuda "é inhumano".

O embaixador paquistaní Asim Iftikhar Ahmad, recollendo a opinión de boa parte dos países musulmáns, resumiu así o que está a suceder en Gaza: "Isto xa non é unha crise humanitaria, é o colapso da humanidade".

"Cando o mundo enteiro esperaba acción, de novo este Consello bloquéase pola acción dun só membro que lle impide cumprir coa súa responsabilidade", concluíu.