En menos dun mes multiplícanse por dous os casos activos de covid notificados
As consecuencias da transmisión comunitaria do virus sófrenas especialmente as persoas maiores de 60 e os que teñen patoloxías graves
A situación repítese mimeticamente en practicamente todas as áreas sanitarais. Por exemplo, en Ourense nas últimas tres semanas multiplicáronse por tres os ingresos que son positivos por covid. Isto non significa que esta enfermidade sexa o motivo principal dos ingresos: aproximadamente o 60 % ingresan por outras causas.
Pero, mesmo así, isto complica o manexo dos pacientes porque estas persoas, tanto pola súa seguridade como pola dos propios sanitarios teñen que ser manexados cuns protocolos moito máis estritos.
"Hai que lembrar que os profesionais sanitarios levan vivindo esta situación moito tempo, e por iso temos que ser moi empáticos e sensibles", explica o xerente da área de Ourense, Félix Rubial.
Cada nova subvariante que prevalece é porque é máis transmisible ca a anterior. Estamos xa na ómicron Ba5, e iso supón que nesta época, tradicionalmente tranquila nos hospitais, hai agora mesmo a trasfega e a saturación propias dos meses do inverno.
No hospital lembran ademais que para diminuír os ingresos o máis importante é protexer a poboación vulnerable, e non só por razóns de idade, tamén polas patoloxías asociadas.
Insisten os sanitarios en que deben usar máscara os que estean en contacto cos vulnerables e os propios vulnerables, porque no seu caso a covid non será un catarro.
