Os avicultores galegos regalan 2.000 quilos de polo en protesta pola precariedade

Prefiren regalar a súa produción a malvendela. Convocados por Unións Agrarias, os avicultores galegos repartiron 2.000 quilos de polo en Pontevedra para facer pública a súa situación.

Denuncian que o prezo do seu produto non cobre os custos de produción, sobre todo pola suba da luz, que representa o 35 por cento dos gastos fixos dunha explotación.

Marina Suárez, avicultora, di: "Subiu a luz, subiu a cama dos polos, todo son subidas, pero a nós seguen a pagarnos o mesmo pola nosa produción e polo noso traballo"

En Galicia hai máis de 600 produtores avícolas que, segundo Unións Agrarias, están traballando a perdas. O sector non recuperou aínda os niveis de venda prepandemia, e para resultar rendible, din, debería subir o prezo da carne.

"Propoñemos unha suba que sitúe o quilo do polo arredor dos 2,90, que lle suporía a calquera consumidor que consome ao ano uns 14 quilos, apenas 2 euros, ou 2,40 euros máis ao ano", di Roberto García, o secretario xeral de Unións Agrarias en Galicia.

O sector anuncia que intensificará as protestas se a súa situación non mellora.

"Imos seguir loitando porque neste momento estamos arruinados. Máis non podemos estar", asegura Javier López, o presidente da Asociación de criadores avícolas de Galicia.

Segundo os datos que manexan, os avicultores galegos reciben cinco céntimos o quilo por debaixo dos custos de produción.