Ordenan a "suspensión provisional" de Petro como presidente ata despois das eleccións

A presidenta da Comisión de Investigación e Acusación da Cámara de Representantes, Gloria Arizabaleta, ordenou este mércores a "suspensión provisional" do presidente colombiano, Gustavo Petro, mentres o investiga pola súa presunta participación na campaña electoral.

A congresista, membro do Pacto Histórico, o mesmo partido de Petro, ordenou "suspender provisionalmente do exercicio do cargo" o mandatario ata o próximo 21 de xuño ás 16:00 hora local (21:00 GMT), cando se pechan as urnas da segunda volta das eleccións presidenciais.

De concretarse esta medida, inédita no país, Petro sería o primeiro presidente de Colombia en ser suspendido do cargo, aínda que a decisión final dependerá do Senado, único que ten a potestade para facelo.

Arizabaleta argumentou a súa decisión en que pode ordenar a suspensión provisional do mandatario "sempre e cando se evidencien serios elementos de xuízo que permitan establecer que a permanencia no cargo, función ou servizo público posibilita a interferencia do autor da falta na tramitación da investigación".

O ministro do Interior de Colombia aclara que só o Senado pode suspender o presidente

 O ministro do Interior de Colombia, Armando Benedetti, aclarou este mércores que a Comisión de Investigación e Acusación da Cámara de Representantes non ten competencia para suspender do cargo o presidente Gustavo Petro.

"En dereito non existe que a Comisión de Acusacións poida suspender o presidente porque é unha comisión de instrución. Só o Senado é quen pode facelo despois de que o pleno da Cámara actúe como un ente acusador, penal ou disciplinariamente", manifestou Benedetti na súa conta de X.

O presidente Petro, que está de visita en Nova York para intervir ante o Consello de Seguridade da ONU, non se pronunciou sobre a decisión da Comisión.

Petro foi denunciado varias veces pola súa presunta participación en política durante a campaña para as eleccións nas que se escollerá o seu sucesor en segunda volta o próximo 21 de xuño, e o 26 de maio a Comisión de Investigación e Acusación da Cámara abriulle unha investigación.

Segundo a Constitución, a citada Comisión, no caso de que a súa investigación atope motivo para sancionar o presidente, debe acusalo ante o Senado, que é o que ten a facultade de suspendelo, polo que a medida deste mércores carece de validez, segundo os xuristas.

Por iso, o ministro Benedetti, man dereita de Petro, engadiu: "Logo a Comisión de Acusacións non pode suspender o presidente da República, e menos a vontade dunha soa representante".

Con Benedetti coincidiu o expresidente do Senado e excandidato presidencial Roy Barreras, quen asegurou que a decisión anunciada "non ten ningunha validez xurídica".

"Como expresidente do Congreso en dúas ocasións ratifico ante os colombianos que a Comisión Legal de Acusacións NON ten ningunha atribución para semellante decisión inconstitucional e, polo tanto, non terá efecto ningún!", manifestou Barreras, que estivo casado con Arizabaleta.

Petro denuncia a vulneración da lei colombiana e apunta a un proceso no Tribunal Supremo

 O presidente de Colombia, Gustavo Petro, denunciou este mércores que, ao seu xuízo, se vulnerou a lei colombiana ao ordenar a súa suspensión.

Petro sostén que a Comisión de Acusación "non é a que suspende" un presidente e apuntou que iso implica "un proceso no Tribunal Supremo de Xustiza".

"Na miña opinión, vulnerouse a lei de Colombia e iso implica un proceso no Tribunal Supremo de Xustiza", declarou Petro ás portas do Consello de Seguridade da ONU, onde coñeceu a noticia da súa suspensión.

A orde esténdese ata o próximo 21 de xuño ás 16:00 hora local (21:00 GMT), cando pechen as urnas da segunda volta das eleccións presidenciais.

A xuízo do mandatario, esta decisión non é máis que "unha pretensión que tería que cumprir todo o proceso".

O mandatario colombiano formulou dúbidas sobre a competencia desta comisión para suspendelo como presidente e asegurou que se trata dunha operación para "extorsionar o Goberno".

Ademais, Petro suxeriu que o avogado de Arizabaleta, Hollman Ibáñez, estaría vinculado co candidato ultradereitista Abelardo de la Espriella.

O mandatario asegurou en todo momento que non fixo "intervencións políticas" e defendeu que a suspensión se debe a "ter un pensamento diferente".

Segundo dixo, polo feito de ser presidente non deixa de ter "dereitos fundamentais", no que se entende como unha alusión ao seu dereito a pronunciarse sobre os comicios.