O'Mega cifra nun 85 % o seguimento da folga de médicos e a Xunta redúceo ao 22,7 %

A Xunta detecta un leve aumento da participación na segunda xornada da folga de médicos contra o estatuto marco proposto polo Goberno central. O sindicato O'Mega cre que é case xeneralizada, e cífraa nun 85 % nos hospitais e nun 55 % nos centros de saúde.

De acordo cos datos facilitados polo Executivo autonómico, o seguimento crece desde o 20 % da xornada de onte en quenda de mañá e alcanza o 22,7 % nas primeiras horas de hoxe.

A participación é maior nos hospitais das sete grandes cidades que nos comarcais (18,7 %), con importantes diferenzas entre o seguimento que alcanzou a folga no Complexo Hospitalario Universitario de Vigo (39,3 %) e o 12,1 % rexistrado no Hospital Público de Barbanza.

O sindicato convocador O'Mega afirma que o seguimento xeral da folga na quenda matinal pasou do 70 ao 85 % no ámbito hospitalario e estima unha participación menor, arredor do 55 %, na atención primaria.

Isto supón, indican, "un sensible incremento respecto á primeira xornada de paros" e conséguese "a pesar dos servizos mínimos abusivos impostos pola Consellería de Sanidade", que, denuncian, "chegaron a alcanzar ata o 120 % dos efectivos dun día normal".

Con motivo desta xornada de protestas, médicos e facultativos doutras ramas sanitarias participaron ao longo da mañá en concentracións ante hospitais e centros de saúde de toda Galicia.

Entre as súas reivindicacións, inclúen cuestións que incumben principalmente ao Goberno central na negociación do estatuto marco e a categoría profesional, pero tamén de competencia autonómica, como a retribución das horas de gardas.