O xuíz arquiva por segunda vez a causa contra Mónica Oltra ao non ver indicios de delito
Reitera que "ninguén debe ser xulgado sen indicios racionais de criminalidade"
O auto coincide co criterio da Fiscalía e refuta as acusacións baseadas en conxecturas
Imaxe de arquivo
O Xulgado de Instrución número 15 de Valencia rexeitou abrir xuízo oral contra a exvicepresidenta da Generalitat Valenciana, Mónica Oltra, e outras catorce persoas pola suposta ocultación dos abusos sexuais cometidos polo seu exmarido a unha menor tutelada. O maxistrado decretou o arquivo provisional da causa por segunda vez, ao considerar que non existe ningún indicio de delito.
No auto, datado este venres, o xuíz coincide “plenamente” co criterio do Ministerio Fiscal, que tampouco aprecia feitos constitutivos de infracción penal nin en Oltra nin no resto de encausados, entre os que figuran antigos cargos e técnicos da Consellería de Igualdade.
“As acusacións, particulares e populares, baséanse en conxecturas", di o xuíz
“Non existe absolutamente ningún indicio de que calquera dos acusados realizase feitos penalmente relevantes”, recolle a resolución, que lembra que xa no anterior auto de sobresemento, posteriormente revogado pola Audiencia Provincial, se sostivera o mesmo criterio.
O maxistrado insiste en que “as acusacións, particulares e populares, baséanse en conxecturas ou sospeitas que non se poden converter en proba de cargo”. E engade: “Ninguén debe ser xulgado sen que exista un só indicio racional de criminalidade, e en conciencia reitero que non os aprecio na conduta dos encausados”.
O auto subliña tamén que as acusacións introducen feitos nos seus escritos que non coinciden cos recollidos nos autos previos, feitos que tampouco foron modificados por ningunha resolución posterior.
Respecto ao dereito de acción das partes, o xuíz non entra a valorar a introdución deses feitos desaxustados, pero advirte das posibles consecuencias que iso pode ter no procedemento.
Un proceso con idas e voltas
A Audiencia Provincial de Valencia ordenara en xuño reabrir a causa tras estimar os recursos presentados por Vox e Gobierna-te, a pesar de que tanto o xulgado como a Fiscalía xa a tiñan arquivada ao non apreciar delito.
A decisión de continuar coa tramitación responde, segundo o xuíz, a un “imperativo legal” derivado dese auto da Audiencia, que consideraba que as responsabilidades penais debían dilucidarse no xuízo oral. Aínda así, o maxistrado agora volve reiterar a falta de indicios e decreta o sobresemento para todos os implicados.
Con esta decisión, que podería ser recorrida, a causa queda provisionalmente arquivada e sen data para xuízo oral. O auto afecta tamén a varios encausados que nin sequera foran formalmente acusados durante o proceso.
