A UCO accede á sede do PSOE por orde xudicial para clonar o correo de Cerdán

Axentes da Unidade Central Operativa da Garda Cvil (UCO) accederon este venres á sede do PSOE na rúa Ferraz de Madrid para clonar o correo corporativo do exsecretario de Organización socialista, Santos Cerdán, por orde do xuíz instrutor do caso Koldo no Tribunal Supremo (TS), Leopoldo Puente.

Tras tres horas no interior da sede socialista, os axentes saíron contra ás 14:30 unha vez realizadas as dilixencias ordenadas polo Tribunal Supremo.

Tamén acudiron ao Ministerio de Transportes, despois de que o xuíz requirira que se facilite aos axentes "o acceso e clonado" da conta de correo corporativa do exministro José Luis Ábalos, outro dos principais investigados.

A UCO accedeu así mesmo ás instalacións do Adif e da Dirección Xeral de Estradas para requirir a información que solicitou o xuíz do Alto Tribunal Leopoldo Puente. O maxistrado quere que o Adif e a Dirección Xeral de Estradas acheguen documentación relativa a unha serie de adxudicacións que estarían baixo sospeita dos investigadores.

O xuíz apreciou indicios "consistentes" contra a expresidenta de ADIF, Isabel Pardo de Vera, e o exdirector xeral de Estradas, Javier Herrero, e deduciu testemuño á Audiencia Nacional para que valore se os investiga, ao considerar que o Supremo non ten competencia. 

Non se trata de rexistros senón de requirimento de información, apuntan as fontes, xa que o maxistrado do Supremo, nun auto coñecido este venres, rexeitou a petición formulada polas acusacións populares de rexistrar a sede do PSOE e o despacho de Cerdán ao tratarse dunha medida "limitativa de dereitos" que non sería útil neste momento.

Imputación de Cerdán e citación para o próximo 30 de xuño

O maxistrado nun auto publicado esta mañá acordou imputar a Santos Cerdán, e citalo para declarar o próximo 30 de xuño.

Tamén autorizou á Unidade Central Operativa (UCO) da Garda Civil a investigar o seu patrimonio, tras o informe que o sitúa como epicentro dunha suposta trama de amaño de obras.

Nese auto, o xuíz imputa formalmente ao exnúmero tres do PSOE Santos Cerdán e ordena investigar o seu patrimonio, e estende a investigación a cinco empresarios ante a sospeita de que puideron pagar mordidas por adxudicacións irregulares.

O maxistrado, iso si, aprazou a declaración de Santos Cerdán ao luns 30 para que o seu novo avogado teña tempo para desenvolver o seu defensa eficazmente, e precisa que xa non será voluntaria senón "preceptiva e en calidade de investigado (…), tendo lugar tras a mesma, comparecencia para o efecto de ponderar a adopción de medidas cautelares de natureza persoal respecto a el".

Considera que Cerdán "puidese participar, actuando de consuno co aforado (Ábalos), na percepción de premios económicos a cambio de concesións irregulares de obras públicas, ao momento que puidese ser el quen se encargase de distribuír entre os diferentes partícipes as cantidades recadadas".

A investigación de contas bancarias esténdese tamén a cinco empresarios, a quen cita entre o 4 e o 7 de xullo como investigados, entre eles, a Antxon Alonso, socio da empresa Servinabar 2000 xunto con Cerdán, sinalada no último informe da UCO por presuntas irregularidades en adxudicacións públicas.

Xunto a Alonso, os outros empresarios son Antonio e Daniel Fernández, Fernando Agustín Merino e José Ruz, como persoas que, "na súa condición, polo menos, de administradores de feito de determinadas entidades mercantís, poderían intervir na indebida adxudicación en favor destas de concretas obras públicas a cambio de prezo". O xuíz incorpóraos neste procedemento porque a súa conduta "aparecería tamén indisociablemente unida" á de Cerdán.

Ademais, o xuíz require a información bancaria con relación ás contas ou produtos que aparezan a nome de calquera dos investigados ou ao das empresas, Acciona, L.I.C., O.P.R. e Servinabar 2000 en cuxo beneficio poderían actuar, así como a nome da fundación Fiadelso, fundación vinculada co exministro. Van investigar preto de 500 contas bancarias.