O Supremo denega a comparecencia de Ábalos na comisión do caso Koldo

O Tribunal Supremo denegou que o exministro José Luis Ábalos compareza este xoves na comisión de investigación do Senado sobre o caso Koldo, a petición do PP.

Ábalos permanece en prisión provisional desde o pasado 27 de novembro.

A través dun auto, o maxistrado instrutor da causa, Leopoldo Puente, sinala que "pola singular présa da solicitude referida" para que Ábalos compareza "non é posible outorgar a autorización interesada".

O maxistrado precisa, con todo, que a Cámara Alta podería volver presentar a solicitude de comparecencia "con tempo suficiente para que resulte posible a imprescindible audiencia previa das partes".

A portavoz do PP no Senado, Alicia García, anunciou a finais de decembro que a comisión de investigación fixaba para o 8 de xaneiro a comparecencia do exministro.

O TS rexeita que Ábalos e Koldo sexan xulgados por un xurado popular 

O Supremo (TS) rexeitou ademais a petición do exministro de Transportes José Luis Ábalos e o seu exasesor Koldo García para que os xulgue un xurado popular no xuízo polas presuntas irregularidades na compra de máscaras durante a pandemia.

Nunha providencia deste mércores, o instrutor, Leopoldo Puente, oponse ao solicitado por Ábalos e por García, alegando que a propia lei reguladora do xurado exclúe esta posibilidade no caso de procedementos atribuídos á Audiencia Nacional, aínda que estes foran asumidos polo Supremo debido ao aforamento dun dos investigados, como é o caso de José Luis Ábalos, deputado no Congreso.

Está previsto que o próximo 15 de xaneiro o Tribunal Supremo celebre unha vista para estudar o recurso de Ábalos contra a súa entrada en prisión provisional o pasado 27 de novembro á espera de que se celebre o xuízo contra el. O exministro enfróntanse a peticións de pena de ata 30 anos de cadea.