O Supremo confirma as penas polo crime de Samuel: un "inexplicable linchamento"
O Alto Tribunal mantén tamén a decisión do TSXG de absolver por falta de probas un cuarto acusado que fora condenado como cómplice en primeira instancia
O Tribunal Supremo (TS) confirmou as penas de entre 20 e 24 anos de prisión impostas aos tres condenados polo asasinato de Samuel Luiz na Coruña en 2021 e sostén que o ataque consistiu nun "inexplicable linchamento".
A Sala do Penal do TS mantén tamén a decisión do Tribunal Superior de Xustiza de Galicia (TSXG) de absolver por falta de probas a un cuarto acusado que fora condenado como cómplice pola Audiencia Provincial en primeira instancia.
Os maxistrados desestiman os recursos de casación tanto das defensas dos tres condenados como da Fiscalía e a acusación particular, estes últimos en contra da absolución do cuarto acusado.
"Foi un ataque sorpresivo (a interacción previa foi meramente anecdótica pola irrelevancia da suposta ofensa), que desde o primeiro momento deixa indefensa a vítima, nunha sorte de inexplicable linchamento”, indica a Sala nunha sentenza na que ademais da aleivosía confirma a agravante de discriminación por motivo de orientación sexual para Diego Montaña.
Así ratifica a pena de 24 anos de prisión para Diego Montaña Marzoa por delito de asasinato coa citada agravante; de 20 anos para Alejandro Freire García por asasinato, e de 20 anos e medio para Kaio Amaral Silva Costa por asasinato e por roubo con violencia pola subtracción do móbil da vítima.
Os tres condenados terán ademais que indemnizar a familiares da vítima en máis de 300.000 euros.
Segundo os feitos probados, a agresión grupal desencadeouse nas inmediacións dun local de copas case ás tres da madrugada, cando Diego Montaña, que estaba coa súa entón parella sentimental, creu que a vítima os estaba gravando cun teléfono móbil.
Dirixiuse a el e díxolle, "Deixa de gravarnos", ao que Samuel contestou que só estaba a realizar unha videochamada.
Tamén se considera probado que Diego lle dixo: "Deixa de gravar, a ver se te vou matar, maricón", e que lle propinou de forma sorpresiva e repentina puñadas e patadas, sobre todo na cabeza e a cara, "pola súa animadversión cara á condición sexual homosexual que lle atribuíu". E ratifica que non pode aplicarse a atenuante de actuar baixo a influencia de bebidas alcohólicas.
Os outros dous acusados sumáronse á agresión, segundo a sentenza que agora se confirma.
Para rexeitar os recursos das defensas, os maxistrados do Supremo argumentan que concorreron todos os requisitos para apreciar a agravante de aleivosía, que configura o delito como asasinato, xa que o violento ataque a golpes foi imprevisible e supuxo un "inexplicable linchamento".
Engaden os maxistrados que foi "algo máis que un abuso de superioridade, o desequilibrio era abafador e a defensa foi anulada desde o primeiro momento", e que a axuda que recibiu a vítima dunhas testemuñas foi posterior.
En canto aos dous coautores do asasinato xunto a Diego, a Sala considera que a súa participación ten base razoable dadas as probas.
O Supremo desestima tamén os recursos da Fiscalía e da acusación particular respecto á absolución de quen a Audiencia da Coruña considerou cómplice, argumentando que é razoable porque nin no vídeo reproducido no xuízo nin nas declaracións das testemuñas se aprecia que facilitase a agresión.
