O sorteo do Euromillóns deixa un millón de euros en Vigo
Un boleto selado nun bar de Balaídos foi agraciado co premio especial do millón
Están convencidos de que é un cliente habitual
A mañá gris e morriñenta coa que amenceron os traballadores e clientes do bar Loreda de Vigo, contrasta coa noticia que agochaba tras as paredes.
Lupe Pregal, xerente do local: "Eu sóubeno esta mañá, cando espertei tiña o móbil a tope, de Loterías, veciños, clientes... e non o podía crer, a verdade. Unha sorpresa moi grande".
No seu local selouse o boleto premiado cun millón de euros no último sorteo do Euromillóns. Foi unha aposta semanal. Dan por feito que lle tocou a alguén do barrio, porque do barrio son o 95 % dos clientes.
"Moi ilusionada de que caera no barrio e facer feliz a alguén, porque isto cámbiache a vida un pouco. É moito diñeiro, entón eu creo que non dará a cara. Temos que ver, pero é aínda cedo. De momento, moi contenta de ter repartido ilusión", explica Lupe.
Non damos co afortunado ou afortunada, pero si con voluntariosos candidatos. "Xa me gustaría que me tocara a min. Eu diríao, todos os males sexan ese". "Eu polo momento non, pero alégrome que fora xente de aquí do barrio", comentan varios clientes.
Pola retranca e os sorrisos, sospeitamos que saben quen é, pero ninguén o recoñece abertamente.
O que teñen claro é que a sorte está ás veces máis preto do que parece. "Sempre pensamos que é algo que non vai pasar aquí, pero si que pasa", conclúe unha clienta.
