O soño cumprido de Pablo Durán como goleador do Celta

Aos 23 anos o tomiñés Pablo Durán cumpriu un soño desde que era cativo: "Soñaba con estar cinco minutos no campo cando vía xogar o Celta en Balaídos. Estar no campo e poder marcar un gol a carón de Iago Aspas é un soño cumprido" asegurou ao final do partido. 

Claudio coñece ben a Durán despois de case dous anos adestrándoo no Celta Fortuna e o dianteiro tamén sabe o que demanda o adestrador. "Coñezo o que quere dos dianteiros e o sistema pero teño moito que mellorar a nivel colectivo e individual" comentou o dianteiro. 

Claudio Giráldez amosouse satisfeito logo do primeiro ensaio de pretemporada. Con apenas sete sesións de adestramento e diante dun rival un pouco máis rodado o equipo competiu e conseguir rabuñar un empate. 

O positivo que sacou o porriñés do partido foron as ubicacións a nivel ofensivo, a actitude do equipo repoñéndose dun 2-0 e a ambición para tentar gañar o partido ata o final. No aspecto negativo considera que "faltou enerxía para recuperar en campo rival", algo normal polas alturas de pretemporada nas que estamos, segundo o adestrador.