Os positivos de covid pódense comunicar por teléfono ou na aplicación do Sergas

O Servizo Galego de Saúde permite desde este luns que as persoas que dean positivo en covid-19 tras realizar un autotest poidan comunicar o seu resultado de maneira oficial mediante un número de teléfono específico e a través da aplicación móbil do propio sistema sanitario.

Nun comunicado, o Sergas explica que desde a xornada de hoxe os cidadáns poderán trasladar o resultado das súas probas "dun modo áxil e cómodo", ben chamando ao número 881 540 045 ou a través da aplicación SergasMóbil.

Ademais do resultado do test e da data do mesmo, pedirase aos usuarios que indiquen se presentan síntomas da enfermidade e se gardan algún tipo de relación con persoas ou contornas vulnerables.