O Sergas comezará en novembro a vacinación contra a meninxite B
A Xunta calcula que 15.000 cativos maiores de dous meses se beneficiarán da medida
A doenza ten baixa incidencia en Galicia, pero é unha das máis graves en nenos
Ata o momento os pais pagaban uns 300 euros polas tres doses da vacina
O calendario galego de vacinación incluirá Bexero, a vacina contra a meninxite B, a partir do mes de novembro. Malia que na actualidade a incidencia é baixa trátase dunha das doenzas máis graves que poden ter os pequenos.
"Hai poucos casos, pero cando os hai a mortalidade é moi alta, un de cada dez nenos morren, e os que sobreviven poden quedar con secuelas graves en dous de cada dez casos", explica Federico Martinón, xefe de Pediatría do CHUS.
Por iso, tres de cada catro cativos galegos xa están vacinados contra o meningococo. A diferenza é que, ata o momento, eran os pais os que pagaban a vacina, uns 300 euros entre as 3 doses recomendadas. Agora é a Administración quen asume os custos.
A medida vai beneficiar uns 15.000 nenos maiores de dous meses, idade recomendada para a primeira dose.
"A recomendación habitual faise para nenos lactantes, dúas doses nos seis primeiros meses de vida e unha terceira cando fai un ano", aclara o doutor Martinón.
Antes de que remate o ano, a Xunta comprometeuse a incluír tamén no calendario de vacinación protección gratuíta contra a gripe e o papiloma nos nenos.
