O seguimento da folga médica en Galicia roza o 20% na cuarta xornada de paros

O seguimento da cuarta xornada da folga de médicos en Galicia foi do 19,3% durante a quenda de mañá, segundo o Servizo Galego de Saúde (Sergas).

Trátase do maior nivel de participación rexistrado ao longo desta semana de paros.

O sindicato corporativo O'Mega, única central galega con representación na mesa sectorial que subscribe esta convocatoria, elevou a participación na protesta ao 86,2% do persoal dos hospitais e ao 25% dos traballadores dos centros de saúde dependentes do Sergas.

Son cifras semellantes ás dos días previos e moi diferentes ás que ofrece a Xunta de Galicia, dado que as dúas partes contabilizan de forma diferente os traballadores que prestan servizos mínimos ou gozan de días libres.

O Goberno galego estima que, en atención hospitalaria, o seguimento da folga foi do 24,5%; mentres que, en primaria, volveu ser considerablemente menor, do 5,3%.

Do mesmo xeito que nas xornadas previas, os hospitais das sete grandes cidades tiveron maior participación na protesta (25,3%) que os comarcais (15,7%) e o de Vigo (35,5%) foi o complexo con maior implicación neste paro.

En Atención Primaria, a de Ourense, Verín e O Barco de Valdeorras volveu ser a área con máis nivel de seguimento (9,5%) e a menor rexistrouse na de Lugo, A Mariña e Monforte de Lemos (2,5%).

Os servizos mínimos, destacan desde a Xunta, cumpríronse na súa totalidade e non se viron afectadas nin a actividade asistencial urxente nin a de emerxencias.

Na quenda de tarde, a participación na folga caeu ao 4% nos centros sanitarios de Galicia, segundo os datos recollidos polo Sergas, que estiman un 3,9% de participación nos hospitais e un 4,3% na Atencion Primaria.

Efectos sobre a asistencia e as listas de espera

O conselleiro de Sanidade, Antonio Gómez Caamaño, reuniuse este xoves cos xerentes das distintas áreas sanitarias de Galicia para avaliar o efecto destas xornadas de folga.

Gómez Caamaño trasladou que, á espera dos datos deste xoves, as protestas obrigaron a suspender, de luns a mércores, preto de 25.000 actos asistenciais; entre os cales se inclúen 13.000 consultas hospitalarias, 10.000 en Atención Primaria e unhas 576 intervencións cirúrxicas, así como ao redor de 1.500 probas complementarias.

O conselleiro considerou que é "imposible manexar as listas de espera con este tipo de folgas", máis se cabe que hai convocada unha semana de folga ao mes ata xuño contra a reforma do estatuto marco, á que se suman outras protestas en Galicia no mes de marzo polo estado da Atención Primaria.

O titular de Sanidade sostivo que "a situación é moi difícil" e por este motivo instou o Goberno central a "solucionar este problema, esta folga, canto antes".

O Ministerio de Sanidade alcanzou un acordo con varios sindicatos (Satse-FSES, CC. OO., UXT e CSIF) o pasado 26 de xaneiro para a reforma do estatuto marco que non subscriben as organizacións médicas convocantes destas protestas (CESM, MC, AMYTS, SME e O'Mega).

Desde O'Mega, no seu comunicado para facer balance da xornada, critican que o conselleiro esixa á ministra Mónica García "que negocie cos médicos para evitar a continuación da folga estatal mentres el mesmo se nega a negociar cos médicos galegos para evitar outra folga en Galicia".