O proceso extraordinario de regularización remata este martes con máis dun millón de solicitudes presentadas

O prazo de presentación de solicitudes á regularización extraordinaria de migrantes conclúe este martes 30 de xuño, tras máis de dous meses desde que o Executivo impulsou o proceso e coa presión de entidades e colectivos para ampliar o prazo.

Ata o momento rexistráronse 1,2 millóns de solicitudes. O Executivo previu nun primeiro momento que máis de 500.000 persoas se beneficiarían deste mecanismo.

Precisamente, o presidente do Goberno, Pedro Sánchez, participará este martes, xunto con algúns ministros, nunha xornada sobre migración.

A ministra de Inclusión, Seguridade Social e Migracións, Elma Saiz, cualificou este luns de "éxito" o procedemento, que lembrou que "colleu a testemuña" da Iniciativa Lexislativa Popular (ILP) que solicitaba a regularización extraordinaria de máis de medio millón de persoas.

"E no que ten que ver coa regularización extraordinaria, sen dúbida é un éxito de procedemento. Saben que este procedemento colleu a testemuña desa Iniciativa Lexislativa Popular, na que se estableceron e se estimaban cifras", asegurou a ministra na rolda de prensa posterior ao Consello de Ministros.

Preguntada polo número de solicitudes presentadas fronte ás previsións iniciais do Executivo, Saiz sinalou que "nunca foron cifras oficiais", senón "estimacións" que recollía a propia ILP. "E así me referín en todo momento", afirmou ao ser cuestionada polo número de solicitudes.

Do mesmo xeito, Saiz recalcou que "máis alá das cifras, detrás de cada unha destas persoas hai historias de vida, de miles de cidadáns que deixan de estar nas marxes invisibles e que van ter dereitos".

A ministra avanzou que a finais de semana comparecerá para ofrecer "todos os datos" da regularización.

Segundo os últimos datos confirmados polo Ministerio de Inclusión, Seguridade Social e Migracións, do 15 de xuño, as solicitudes presentadas xa superaban as 900.000 peticións desde que se abriu o proceso o pasado 16 de abril.

En calquera caso, estes datos están "aínda pendentes de depuración" e advertiron de que, tal e como ocorreu na regularización da dana de Valencia, "poden existir duplicidades e factores que inflúan provisionalmente nos datos iniciais".

"O proceso estase a desenvolver con total normalidade. Tras a súa minuciosa revisión caso por caso, estanse remitindo xa autorizacións provisionais a todos os puntos de España", destacaron.

Ante o temor de que existan persoas que poidan quedar fóra por falta de tempo para presentar a súa documentación, o movemento 'Regularización Xa' levou ao Congreso o 10 de xuño unha proposición non de lei para ampliar o prazo do procedemento, co apoio de Podemos, Sumar, EH Bildu, ERC e BNG.

"A data do 30 de xuño é unha data arbitraria. Sabemos que o Goberno está dicindo que non pode amplialo pero sabemos que, se hai vontade política, isto pódese levar adiante", subliñou en declaracións aos medios fronte á Cámara Baixa unha das voceiras de 'Regularización Xa', Victoria Columba.

Precisamente, a secretaria xeral de Podemos, Ione Belarra, fixo súa esta semana no Pleno do Congreso a reclamación do movemento 'Regularización Xa' e afeou á ministra de Inclusión, Seguridade Social e Migracións, Elma Saiz, que non sexa flexible cos prazos.

"Se a Administración Pública tiña 15 días para admitir a trámite os expedientes, e sabe perfectamente que ese prazo non se está a cumprir nin de lonxe, por que non lles dan máis tempo ás persoas que non teñen capacidade material de reunir todos os papeis necesarios?", preguntou durante a sesión de control ao Goberno.

Duplicidades

A Comisión Española de Axuda ao Refuxiado (CEAR) situou o pasado luns 15 de xuño nun millón as solicitudes á regularización, aínda que tamén advertiu da posibilidade de duplicidades.

Neste sentido, López sinalou que, segundo os datos cos que conta CEAR, hai admitidas a trámite "unhas 300.000", é dicir, un 30 % das solicitudes presentadas. Ademais, dixo que hai "atraso" na admisión a trámite das solicitudes. "Os 15 días dos que se falou nun primeiro momento, na maioría dos casos non se están a cumprir", apuntou.

Do mesmo xeito, a directora xeral da entidade advertiu de que o número final de solicitudes podería superar as cifras actuais, posto que hai persoas que teñen dificultades para obter e legalizar a documentación esixida polas autoridades españolas.

"Probablemente serán máis", destacou, ao tempo que detallou que, nos últimos días do prazo, podería producirse un novo repunte de solicitudes, especialmente entre persoas procedentes de países onde a obtención e legalización de documentos resulta máis lenta e complexa.

Igualmente, reclamou flexibilidade no caso de que os atrasos burocráticos impidan a algunhas persoas completar o seu expediente dentro do prazo establecido. Nese escenario, formulou a posibilidade de ampliar os prazos ou adoptar medidas extraordinarias que permitan garantir o acceso efectivo á regularización.