Publicador de contidos

O primeiro ministro de Irak sae ileso dun ataque con dron bomba na súa casa

O primeiro ministro de Irak sae ileso dun ataque con dron bomba na súa casa

O mandatario convida ao "diálogo construtivo" nun momento de gran tensión

G24.gal 07/11/2021 08:43

O primeiro ministro iraquí, Mustafa Al Kazemi, afirmou este domingo que se atopa ben despois dun ataque con dron bomba dirixido contra a súa residencia no centro de Bagdad. O mandatario convidou ao "diálogo construtivo" tras un momento de gran tensión polos resultados das eleccións lexislativas do pasado 10 de outubro.

"A miña casa foi branco dunha agresión covarde e grazas a deus, os que traballan comigo e eu estamos ben", dixo Al Kazemi nun breve discurso publicado por medios locais iraquís.

Al Kazemi dixo que "os mísiles e os drons nunca constrúen patrias nin futuro" e engadiu que traballarán para "construír" a nación "mediante o respecto do Estado e as súas institucións para un futuro mellor para os iraquís".

Esta madrugada, a Célula de Información de Seguridade sinalou nun comunicado que se produciu "un intento errado de asasinato contra o primeiro ministro, o Comandante en Xefe das Forzas Armadas, cun dron con explosivos, lanzado contra a súa residencia na Zona Verde en Bagdad".

Pouco despois, o propio primeiro ministro confirmou a través da súa conta de Twitter que se atopa ben e pediu calma á poboación.

Área fortificada

A Zona Verde, na que se atopa a residencia do primeiro ministro, atacada á primeira hora deste domingo, é unha área fortificada no centro de Bagdad, que concentra ademais un bo número de edificios gobernamentais e embaixadas estranxeiras.

Este atentado prodúcese nun momento de tensión en Iraq tras os choques violentos entre manifestantes e policías durante unha manifestación o pasado venres na capital, fronte á propia Zona Verde, contra os resultados das eleccións lexislativas do pasado 10 de outubro.

Os enfrontamento deixaron dúas persoas mortas e máis dun cento de feridas, moitas delas policías. Varios partidos iraquís consideran fraudulento o escrutinio oficial, especialmente os que representan ás milicias integradas na Multitude Popular, na súa maioría xiítas e proiraníes, que sufriron unha gran perda de voto respecto ás eleccións de 2018.

Os seus simpatizantes manteñen desde hai case dúas semanas unha acampada de protesta fronte a Zona Verde.

 

Publicidade
Publicidade
Publicidade
Pódeche interesar

Publicador de contidos